Ինչպես ամեն կիրակի, այնպես էլ այս կիրակի` նոյեմբերի 17 –ին, քաղաքամայր Երևանի Սուրբ Գրիգոր Լուսավորիչ եկեղեցում կմատուցվի սուրբ Պատարագի արարողությունը: Պատարագի ավարտին մասնակիցները կհրավիրվեն սիրո ճաշի:
Կիրակին առանձնահատուկ է լինելու նրանով, որ տեր Հակոբ քահանա Խաչատրյանի նախձեռնությամբ և անմիջական ղեկավարությամբ այդ օրը կանցկացվի «Մաքուր հոգով մաքրենք մեր շրջապատը» խորագրով միջոցառումը:
Սիրելի քրիստոնյաներ պատարագի ընթացքում զորանալով սրտաբուխ աղոթքներով , մասնակցենք շրջակայքի մաքրմանը: Եվ այս քայլը ընկալենք որպես հոգևոր վերածնության ճանապարհ և միջոց հավատքի վերանորոգման և վերազարթոնքի: Թող այդ ուխտն ու աստվածահաճո գործը դառնա ներանձնական կյանքում հոգևոր խաղաղության վերահաստատման միջոց: Ամեն մի ուխտի նպատակը սրտաբուխ աղոթքն է, ինչը սրբազան որևէ նպատակի համար ուխտ արած քրիստոնյայի հոգու խորքից առավել ջերմեռանդորեն է բխում և լսելի դառնում Աստծուն:
Միջոցառման ավարտին Սուրբ Գրիգոր Լուսավորիչ եկեղեցու հոգևոր հովիվ բարեշնորհ Տեր Հակոբ քահանա Խաչատրյանի օրհնությամբ մասնակիցներին կբաժանվեն խաչեր:
Սիրելի Հայորդիներ, համախմբվենք մեկ ընդհանուր գաղափարի շուրջ և զորացնենք հայ քրիստոնյայի կերպարը:
