Ապահովագրական ընկերությունը դեռ չի փոխհատուցել «Սպայկա» ընկերությունում հրդեհի պատճառած վնասի չափը: Այս մասինTESADASHT.am-ի թղթակցի հետ զրույցում հայտնեց «Սպայկա» ընկերության մամուլի խոսնակ Կարեն Բաղդասարյանը:
«Ապահովագրական ընկերությունը դեռ եզրակացություն չի տվել վնասի չափի մասին, և հետևաբար՝ հատուցում չի եղել», - նշեց Կ. Բաղդասարյանը:
Հարցին, թե ո՞ր ապահովագրական ընկերությունում է ապահովագրված «Սպայկան», Կարեն Բաղդասարյանը պատասխանեց. «Հիմա չեմ կարող ասել, թե որ ապահովագրական ընկերությունն է, հետաքննության ավարտից հետո հրապարակենք»:
Հիշեցնենք, որ մայիսի 15-ին ժամը 23: 58-ին հրդեհ էր բռնկվել Երևանի Արշակունյաց պողոտայի թիվ 252 հասցեում գտնվող «Սպայկա» ՍՊԸ-ում: Տեղում պարզվել է, որ այրվել է սառնարանային տնտեսություն, արտադրական հոսքագծեր, էլ. ամբարձիչներ և պլաստմասե իրեր: Հրդեհաշիջման աշխատանքներին մասնակցել են 18 մարտական հաշվարկ, 4 ավտոսանդուղք, թիվ 4 ՀՓՋ-ի ԳԾՊԾ օղակը, ՃԿԿ ԱԻ արձագնքման խմբերը և ՀՆՓԱԻ կենտրոնի երկու փրկարարական ավտոմեքենաները:
Հեղինակ՝ Կրիստինա Գագիկովնա
http://tesadasht.am/hy/news/202