«Այ կի կենտո կարատեի» ֆեդերացիան Հայաստանում Հիմնադրվել է 2006 թ-ին Դավիթ Աթանեսյանի գլխավորությամբ: Այն զարգացնում է Հայաստանում կարատեն իր բոլոր տեսակներով: Ֆեդերացիայի սաներից է եղել Վահրամ Տեր- Վարդանյանը, ով արդեն 10 տարի է ինչ զբաղվում է այ կի կենտո կարատեով և գրանցել է լուրջ հաղթանակներ: Վահրամը ընդամենը 17 տարեկան է և հասցրել է բազմաթիվ անգամ իր հաջողություններով ուրախացնել մեզ: Նա ճանաչվել է Հայաստանի բազմակի չեմպիոն, մի քանի տարի առաջ Կովկասի մրցույթում գրավել է առաջին տեղը, եղել է Եվրոպայի առաջնության հաղթող:
- 2004 թ-ից Հայաստանում լրջորեն զբաղվում եմ սպորտով: 42 անգամ եղել եմ Հայաստանում իրականացված առաջնությունների հաղթող: Վրաստանի առաջնությունում մասնակցում էի առաջին անգամ: Կիսաեզրափակիչում հաղթեցի ադրբեջանցի մարզիկին, իսկ եզրափակիչում մեր հայ մարզիկին, - նշեց Վահրամը:
Նրա հետ զրույցի ընթացքում պարզեցինք, որ Ֆեդերացիան որևէ լուրջ հովանավորություն չի ստացել, մարզիկները մրցումներին մասնակցել են սեփական միջոցներով:
- Հայաստանում ավելի շատ ուշադրություն են դարձնում օլիմպիական մարզաձևերին, իսկ այ կի կենտոն դեռ չի մտել օլիմպիական մարզաձևերի մեջ:
Վահրամը բազմաթիվ մեդալներով վերադարձել է Հայաստան, ևս մեկ անգամ ապացուցելով, որ անկախ ամեն դժվարությունների Հայաստանի պատիվը բարձր են պահել դրսում:
Մեր այն հարցին թե կցանկանաս սպորտով առաջ գնալ Հայաստանում, Վահրամը պատասխանեց, - եթե հովանավոր ունենանք անպայման կցանկանամ, քանի որ շատ եմ սիրում կարատեն, ու կարող եմ բարձր պահել Հայաստանի անունը: Նրանք կարիք ունեն հովանավորման և աջակցության: