Լոնդոնում կայացած աճուրդի շրջանակներում վաճառքի են հանվել Ուելսի հանգուցյալ արքայադուստր Դիանայի 10 ամենահայտնի զգեստները, որոնց վաճառքից գոյացած գումարը կազմել է 1, 2 մլն դոլար, հայտնում է The Telegraph-ը։
Աճուրդի կազմակերպիչ Քերի Թեյլորը նշել է, որ, գնելով Դիանայի ամենակուլտային զգեստները, մարդկանց բացառիկ հնարավորություն է ընձեռվում մի պահ առնչվել Մեծ Բրիտանիայի ժամանակակից պատմությանը։
Վաճառված նմուշների շարքում է նաև հանրահայտ մուգ կապույտ զգեստը, որով 1985թ. արքայադուստրը Սպիտակ տանը կազմակերպված պարահանդեսի ժամանակ պարել է հոլիվուդյան դերասան Ջոն Տրավոլտայի հետ։ Վիկտոր Էդելշտեյնի հեղինակած զգեստը վաճառվել է 362 հազար դոլարով։
Արքայադուստր Դիանան, ով կենդանության օրոք եղել է նորաձևություն թելադրող համաշխարհային դեմք և բարեգործ, 1981թ. ամուսնացել է Մեծ Բրիտանիայի արքայազն Չարլզի հետ։ Արդյունքում լույս աշխարհ են եկել նրանց 2 որդիները՝ Ուիլյամն ու Հարին, սակայն 1996թ. զույգն ամուսնալուծվել է։ Դիանան մահացել է 1997թ. Փարիզում՝ ավտովթարի հետևանքով։
