Ի՞նչ են մտածում մեր երկրի արտաքին դիվանագիտության պատասխանատուները
12:20, Thursday, 17 July, 2014
 Եվրոինտեգրման անհասկանալի կասեցում, Մաքսային միության դեռեւս մշուշոտ ապագա, Ղարաբաղյան հիմնահարց… Այս ցանկը կարելի է անվերջ շարունակել: Եվրամիության հետ Ասոցացման համաձայնագրի շուրջ երեքուկես տարի բանակցելուց հետո Հայաստանը 2013թ. սեպտեմբերի 3-ին նախագահի մակարդակով հայտարարեց, որ որոշել է Ռուսաստանի, Ղազախստանի ու Բելառուսի հետ անդամակցել Մաքսային միությանը և հետագայում մասնակցել Եվրասիական տնտեսական միությանը։ Սակայն ամենաուշագրավ իրադարձությունները սկսեցին տեղի ունենալ հենց Մաքսային միության անդամակցության շուրջ ծավալվող գործընթացների արդյունքում: Նախ՝ Եվրասիական տնտեսական բարձրագույն խորհրդի ընդլայնված կազմով նիստի ժամանակ Ղազախստանի նախագահ Նուրսուլթան Նազարբաևը հիշատակել է Ադրբեջանի նախագահ Իլհամ Ալիևից ստացած նամակի մասին, որում ասվում է, որ Հայաստանը Եվրասիական տնտեսական միությանը կարող է միանալ միայն այն սահմաններով, որոնցով մտել է Առևտրի համաշխարհային կազմակերպություն (ԱՀԿ): Նազարբաևն այսպիսով կոչ է արել Եվրասիական տնտեսական միությանը Հայաստանի միանալու վերաբերյալ պայմանագրում ևս մեկ կետ ավելացնել՝Հայաստանը միանում է ՄԱԿ-ում ամրագրված իր երկրի սահմաններով։ Բոլորին է հասկանալի, որ սա նշանակում է, որ Հայաստանը կարող է անդամակցել վերոնշյալ կառույցին, սակայն առանց Լեռնային Ղարաբաղի: Հայ հասարակությունը դեռ ուշքի չէր եկել Նազարբաեւի հայտարարությունից հետո, երբ մեր երկրի արտաքին դիվանագիտությունը ստացավ երկրորդ ապտակը: Այս անգամ էլ Ռուսաստանի տնտեսության զարգացման նախարար Ուրուկաևը հայտարարեց, որ Եվրասիական միության «դուռը» բաց է Ադրբեջանի համար և կոչ էր արել այդ երկրին դառնալ միության անդամ: Այս ամբողջ թոհուբոհի վարդն էլ դարձավ Ղազախստանի նախագահի մամլո ծառայության հաղորդումն այն մասին, որ Նուրսուլթան Նազարբաևը Բոդրումում թյուրքախոս պետությունների համագործակցության խորհրդի նիստից հետո հայտարարել է, որ Թուրքիան ապագայում կարող է դառնալ Եվրասիական տնտեսական միության ասոցացված անդամ։ Կարծում եմ իրադարձությունների նման ընթացքի մասին բացատրություններ տալն անգամ ավելորդ է, քանզի փաստերն առավել քան խոսուն են: Անհասկանալի է մնում միայն մեկ բան. ի՞նչ են մտածում մեր երկրի արտաքին դիվանագիտության պատասխանատուները եւ ինչպես են պատրաստվում դիմակայել ՀՀ «գործընկեր» երկրների կողմից գործադրվող ճնշմանը: |
Like
1
Dislike
0
2667 | 0 | 1 | 0
