Articles

Դու դեռ չես մեռել իմ հիվանդ սրտում,
     Դու դեռ ապրում ես երազի նման.
     — Բայց չէ՞ որ միշտ էլ երազ էր միայն
     Պայծառ պատկերըդ այս անապատում…

Ես քեզ սիրում եմ, դու դեռ չես մեռել
     Ես ամենուրեք քե՛զ եմ որոնում.
     Դու, երազների լուսե օրրանում՝
     Անո՛ւրջ, որ գուցե բնավ չես եղել…

Քեզ իմ կարոտի կսկիծն է վառել
     Երազանքներում իմ նվիրական.
     Իմ քույր, իմ դահիճ, իմ սուրբ սիրեկան,
     Ես քեզ սիրում եմ, դու դեռ չես մեռել…
     Վ. Տերյան