Այս պահին ԱԺ-ում ակտիվ քննարկումներ են ընթանում Ռամիլ Սաֆարովի արտահանձնման և Ադրբեջանում նրան ներում շնորհելու հետ կապված:
Ազգային ժողովի Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը բավականին սուր ելույթով հանդես եկավ խորհրդարանում նշելով, որ ինքն ամենևին էլ ցանկություն չունի խոսել Ադրբեջանի քայլերի մասին, այս պահին ժամանակն է անկեղծ լինել և խոստովանել, թե ինչով էինք մենք զբաղված, երբ մեկ տարի շարունակ Ադրբեջանն ամեն ինչ անում էր հանցագործին ազատելու ուղղությամբ:
ԲՀԿ-ական պատգամավորն ամբիոն բարձրանալուն պես նախ նշեց, որ հավանաբար ԱԳ նախարարն ու փոխնախարարը հոգնեցին ԱԺ քննարկումներից, քանի որ լքել էին նիստերի դահլիճը: ԱԺ նախագահ Հովիկ Աբրահամյանն էլ ի պատասխան Նաիրա Զոհրաբյանի նշեց, որ ոչ թե հոգնել են, այլ այս պահին քննարկումներ են անցկացնում:
Նաիրա Զոհրաբյանը իր ելույթում անդրադարձավ այն հանգամանքին, որ դեռևս օգոստոսի 20-ին Հունգարիայի հայ համայնքի փոխնախագահը հանդիպել է ԱԳ-ի և Սփյուռքի նախարարությունների բարձրաստիճան պաշտոնյաների հետ և զգուշացրել Հունգարիայի և Ադրբեջանի քայլի մասին: Ըստ Զոհրաբյանի, հայ համայնքի փոխնախագահը նշել է նաև, որ այդ հարցով իրենք դիմել են Հունգարիայի ԱԳՆ-ին և նրանք հաստատել են, որ Հունգարիան նախատեսում է Ադրբեջանին արտահանձնել Ռամիլ Սաֆարովին:
Սակայն հայ համայնքի փոխնախագահն այդպես էլ Հայաստանից որևէ արձագանք չի ստացել:
«Հունգարիայի ԱԳՆ և խորհրդարանը ավելի ազնիվ են գտնվել Հունգարիայի հայ համայնքի հետ, քան մեր գերատեսչությունները, որոնք պնդում են, որ տեղեկացված չեն եղել արտահանձնման մասին որոշմանը: Հարց եմ ուզում տալ Ազգային անվտանգության ծառայության և Արտագին գործերի նախարարության աշխատակիցներին` ինչո՞վ էիք զբաղված դուք, երբ Ադրբեջանը ջանք չէր խնայում իր հրեշին ազատ արձակելու համար», -իր խոսքում նշեց Ն. Զոհրաբյանը:
