«Էրեբունի հնավայրի վերականգնման, այցելուների սպասարկման հետ կապված երկու աշխատանքային և յոթ էսքիզային նախագիծ կա ցանկապատին և պահակակետերին վերաբերող աշխատանքային նախագիծն արդեն պատրաստ է, իսկ էսքիզային նախագծերը, որոնք վերաբերում են միջնաբերդին, պալատական կառույցներին, կարասային սրահին, Խալդի աստծո տաճարին, Ուրարտական խոհանոցին, ընթացքի մեջ են», - այսօր լրագրողների հետ հանդիպմանը հայտնեց Էրեբունի պատմահնագիտական արգելոց-թանգարանի տնօրեն Գագիկ Գյուրջյանը:
Ծրագիրն իրականացնել նախատեսվում է արդեն այս տարի, որպեսզի 2018 թվականին Էրեբունու 2800 ամյակը նշելիս աշխատանքները որոշ չափով ավարտված լինեն: Ծրագրվում է նաև հուշարձանի, սակայն ոչ ամրոցի տարածքում, ազգագրական ուրարտական ճաշարան կառուցել, որը կտեղակայվի ուրարտական տանը, իսկ մատուցողները ուրարտական տարազ կհագնեն:
«Ճաշարանի ստեղծումը չի նշանակում Էրեբունու տարածքում ռեստորան բացել», - նշեց Գագիկ Գյուրջյանը՝ հավելելով, որ ճաշարանում կներկայացվեն ուրարտական ժամանակների բաղադրատոմսերով պատրաստված ուտեստներ:
Պեղումների ժամանակ հայտնաբերվել են գարի, սիսեռ, սալոր, ոսպ, ոչխարի միս, հորթի միս, գինի և գարեջուր: Այժմ մասնագետները փորձում են վերստեղծել այդ ժամանակների ճաշացանկը:
Բանախոսը նշեց նաև, որ ամբողջ նախագծի արժեքը 8 մլն դոլար է գնահատվում:
Անուշ Այվազյան
