20 տարի առաջ անունը նույնը թողեց, փոխեց միայն ազգանունը, փոխեց և նորովի զրույցի բռնվեց իր հավատարիմ և նոր ընթերցողների հետ, կիսեց նրանց ուրախությունները և … հետո դարձավ անբաժան ընկեր ու խորհրդատու:
«ԱՐԱՐԱՏ» ի հետ իմ բարեկամությունը սկսվեց, երբ դեռ շրջանային թերթ էր, մարզային՝ լինելուց էլ շարունակվեց և շարունակվում է այդ ընկեր-բարեկամությունը…
Մարզային «ԱՐԱՐԱՏ» ը բոլորում է իր 20-րդ տարին մի այնպիսի շրջանում, երբ թշնամին ոտնձգություն է կատարում և խախտում՝ Հայոց և Արցախ աշխարհի անդորրը, երբ նրա հասակակից մեր քաջարի զինվոր-զավակները անմահանում և հերոսանում են մարտի դաշտում:
Փա՜ռք մեր մարտիրոսված արի զավակներին և փա՜ռք մեր «ԱՐԱՐԱՏ» ին, որ իր էջերում արձանագրում է Հայոց Հայրենական պատերազմի սխրանքները և խոնարհումները:
-Իմ անբաժան ընկեր ու խորհրդատու «ԱՐԱՐԱՏ», սրտանց, ջերմորեն շնորհավորում եմ քո՝մարզայինի, առաջին համարի լույս ընծայման 20-ամյակը, որը մի առանձնահատուկ ուրախություն է խմբագրի, խմբակազմի, ընթերցողների և թղթակիցների համար:
20 տարվա ուղղու տարբեր հատվածներում, թերթի ղեկիդ մոտ աներեր կանգնած են եղել գործին գիտակ խմբագիրներ Կարինե Աշուղյանը, Նելլի Բեգլարյանը, որոնց անդուլ աշխատանքի շնորհիվ դարձել ես մարզի համար հարազատ և անմոռանալի:
Մեր մարզի բարեխիղճ և ճշտապահ տարեգիր և նրա առաջընթացի խոսուն վկա «ԱՐԱՐԱ՛Տ», մաղթում եմ բեղմնավոր գործունեություն և պատվավոր, վսեմ հաջողությունների մի կանաչ, բաց ճանապարհ:
ԶԱԲԵԼԱ ԱԲԵԼՅԱՆ
ՓՈՔՐ ՎԵԴԻ ԽՈՐ ՎԻՐԱՊ» թերթի խմբագիր
