Գյուղում ամփոփվեց «Նշան Զադոյան» թենիսի մրցաշարը:
Արդեն երկրորդ տարին է, որ Փոքր Վեդու գյուղապետարանը (գյուղապետ Նորիկ Մարտիրոսյանը) և մշակույթի տունը (տնօրեն Օֆելյա Համբարձումյանը) մեկնարկում են «Նշան Զադոյանի» անվան թենիսի մրցաշարը: Շուրջ մեկ շաբաթ տևած մրցապայքարում թենիսիստները ցուցաբերեցին շատ գեղեցիկ ու գրավիչ խաղ և ստիպեցին թենիսի սիրահարներին վայելել իրենց կողմից այդքան սիրված սպորտաձևը: Պայքարը համառ և անզիջում էր թենիսիստ Հակոբ Մինասյանի համար: Անցած տարվա մրցաշարում հաղթանակելով, գրավելով առաջին տեղը, այս մրցաշարում էլ իր տեղը հաստատուն պահեց և ընդհանուր հաշվարկով՝ իր մոտ պահեց առաջին կարգի դիպլոմը, գավաթն ու տեղը: Երկրորդ տեղ գրաված թենիսիստ Գրիգոր Սարգսյանը և երրորդ տեղ գրաված թենիսիստ Դավիթ Համբարձումյանը արժանացան պատվոգրերի և գյուղապետարանի նվերների: Խրախուսական պատվոգրեր ստացան թենիսիստներ Նշան Զադոյանը և Սամվել Դավթյանը:
Թենիսի նկատմամբ սերը այնքան բուռն էր, որ որոշեցին նաև կազմակերպել միջհամայնքային թենիսի մրցաշար և այն մեկնարկեցին, առաջինը՝հարևան Լուսառատ գյուղում: Եզրափակիչում էին փոքրվեդեցիներ Հակոբ Մինասյանը և Գրիգոր Սարգսյանը, լուսառատցի Արմեն Ամիրջանյանը:
Ու նորից անզիջում պայքար էր Հակոբ Մինասյանի համար, պայքարը պսակվեց Հակոբ Մինասյանի հաղթանակով՝գրավելով նորից առաջին տեղը: Երկրորդ և երրորդ տեղերը բաժանվեց Արմեն Ամիրջանյանի և Գրիգոր Սարգսյանի միջև:
Ամփոփելով մրցաշարի արդյունքները գյուղապետ Նորիկ Մարտիրոսյանը շնորհավորեց Նշան Զադոյանին, հաղթանակած թենիսիստներին և հավելեց՝ այս սպորտաձևը ուժ ու զորություն ունի, այն պետք է ավելի լավ զարգացնել և նոր անուններ ընդգրկել:
ԶԱԲԵԼԱ ԱԲԵԼՅԱՆ
Փոքր Վեդի