Մանուկների մոտ ատամների ամենահաճախ հանդիպող հիվանդությունը կարիեսն է, որը ճիշտ ժամանակին չբուժելու դեպքում հանգեցնում է այլ հիվանդությունների: Տարածված հիվանդություններից է նաև դիմածնոտային անոմալիաները, որոնք երեխաների մոտ տեսանելի է լինում երկու տարեկանից: Խանգարված քթային շնչառությունը դիմածնոտային համակարգի ֆունկցիայի աղավաղում է բերում: Այս մասին ասուլիսում ասաց «Սոնատո» ատամնաբուժարանի տնօրեն, բ.գ.դ, բժիշկ-օրթոդենտ Արթուր Փափազյանը:
Նրա խոսքով, ընդհանրապես, ատամների հիվանդության առաջացման պատճառներից է` էկոլոգիական խնդիրները, սնունդը: Երեխաների մոտ, ըստ մասնագետի, ատամների հիվանդության առաջացման պատճառներից է նաև` ժառանգական գործոնը, մոր հղիության ընթացքում տարած սթրեսները, ընդունած սնունդը:
Բանախոսն ասաց, որ ընդունված է ատամները սկսել լվանալ 1-2 տարեկանից, օրական` 2 անգամ: Պետք է դիմել բժշկի սկսած 2-3 տարեկանից` պրոֆիլակտիկայի համար, եթե իհարկե, մինչ այդ որևէ գանգատ` ցավի տեսքով, երեխան չի ունենում: Մեծահասակները տարին 2 անգամ պետք է այցելեն ատամնաբույժի:
Ա. Փափազյանը նշեց, որ ծնողների շրջանում տարեցտարի աճում է մտահոգվածությունը, այսինքն սկսել են ցանկացած թեթև ցավի, կամ որևէ խնդիր նկատելու դեպքում, դիմել բժշկի: Նա փաստեց, որ նվազել են դեպքերը, երբ դիմում են ռախիդության հետ կապված որևէ խնդրով:
Մասնագետի խոսքով, մանկական ստամատոլոգի աշխատանքը բավականին բարդ է ու քչերն են ընտրում այդ մասնագիտությունը:
