Հոդվածներ

Արեւի շողից շղթա հյուսեցի,

Աստղերն ադամանդ վրան շարեցի,

Լուսնից զույգ օղեր ես հնարեցի,

Ամպերն իբրեւ քող քեզ նվիրեցի:

Լեռներից բարձր մի գահ կերտեցի,

Փունջ ծաղիկներից ճամփա գծեցի,

Գետերը բոլոր մի տեղ ժողվեցի,

Թագուհուս համար հայելի դարձրեցի:

Մոտեցա գահին ու խոնարհվեցի,

Վարդերից շինված թագն ընծայեցի,

Սոխակի ձայնով սերս երգեցի,

Սրտիս տիրուհի քեզ թագադրեցի:

Իջար բարձունքից, ձեռքս բռնեցիր,

Ընծաներն ամբողջ մի կողմ թողեցիր,

Գրկեցիր ամուր ու համբուրեցիր,

Հավիտյան սիրո երդում տվեցիր:

Եւ ցնծաց աշխարհն այնժամ մեր սիրուց,

Ու երջանկացած քո այդ համբույրից,

Ես էլ երդվեցի սիրել հավիտյան,

Սիրել անսահման, լինել անբաժան...