Երևանի քաղաքապետարանի նախաձեռնությամբ նոյեմբերի 21-26-ն անցկացված «Երևանի արտաքին գովազդի փառատոն 2017» -ը եզրափակվել է մրցանակաբաշխությամբ: Միջոցառմանը ներկա է գտնվել Երևանի քաղաքապետի տեղակալ Դավիթ Օհանյանը:
Երևանի քաղաքապետի անունից ողջունելով մասնակիցներին` քաղաքապետի տեղակալը շնորհավորել է փառատոնի կայացման առթիվ:
«Երկրորդ տարին անընդմեջ Երևանում անցկացվեց արտաքին գովազդի փառատոնը: Այս օրերի ընթացքում կազմակերպված միջոցառումներն, իրոք, բովանդակալից էին: Վստահ եմ, որ միջազգային մասնագետների գիտելիքներն ու խորհուրդները լավ հիմք կհանդիսանան առաջիկայում մայրաքաղաքում նոր ու ժամանակակից լուծումներով գովազդներ տեսնելու համար՝ հատկապես հաշվի առնելով, որ հաջորդ տարի Երևանը նշելու է հիմնադրման 2800-ամյակը» , -ընդգծելէ Դավիթ Օհանյանը:
Մրցանակաբաշխության արդյունքներով «Կրեատիվ դիզայն արտաքին գովազդում» անվանակարգում լավագույնն է ճանաչվել «Իմէքս գրուպը» ՝ «Կերամիկա» խանութների ցանցի համար պատրաստված գովազդով: «Կրեատիվ մոտեցում» անվանակարգում հաղթել է «Դիիմ Քոմյունիքեյշնզը» ՝ «Եվրամիությունը՝ Հայաստանի համար» նախագծով: «Լավագույն ադապտացիա» անվանակարգում ժյուրիի և առցանց քվեարկությամբ հաղթել է «Բիգ բորդը» ՝ «Հիտաչի» բրենդով: «Առլուպայի» ընկերության «Սինեմա քուեսթ» գովազդային նախագիծը լավագույնն էր «Նորարարական լուծում արտաքին գովազդում»: «Լավագույն գովազդային կրիչ» անվանակարգում էլ հաղթել է «Յունիվերսալ Գրաֆիքսը» ՝ եռակողմ լեդ էկրանի համար: Մրցանակաբաշխության արդյունքներով «Լավագույն գովազդային արշավ» է համարվել «Երեմյան փրոջեքթսի» ՝ «Շերեփ-երաժշտական գործիքներ» աշխատանքը, իսկ «Լավագույն սոցիալական գովազդ» արշավում հաղթանակը շնորհվել է «Էգա» ընկերությանը՝ «Հայ մեծերը» շարքի համար:
Լավագույն «Չիրականացված գովազդային արշավ» համարվեց «Դոպինգ» ընկերության՝ ծխելու դեմ արշավը, իսկ «Չիրականացված նորարարական լուծում արտաքին գովազդում» ՝ «Աութդոր էֆեկտը» ՝ «Մյուզիք էյ Էմ» աշխատանքով:
Փառատոնի կազմակերպիչները հույս են հայտնել, որ չիրականացված գովազդային մտահղացումներն առաջիկայում իրենց տեղը կգտնեն մայրաքաղաքում, իսկ արդեն իսկ լավագույնը ճանաչված ընկերությունները կպահպանեն իրենց յուրօրինակ մոտեցումը արտաքին գովազդի ոլորտում:
