Ադրբեջանը, Ղազախստանը, Վրաստանը և Ուկրաինան արձանագրություն են ստորագրել Ռուսաստանը շրջանցող միջազգային տրանսպորտային երթուղու շահագործման վերաբերյալ:
Անդրկասպյան տրանսպորտային երթուղու բեռնափոխադրման տեխնիկական մանրամասները կարգավորող արձանագրությունները նախատեսվում են ստորագրել փետրվարի 20-ին: Դրանից հետո, ուկրաինական կողմի հաշվարկներով, Կիևը կկարգավորի այդ երթուղու առևտրային շահագործումը: Այս մասին հաղորդում է տարածել РИА Новости-ն:
Կայքի փոխանցմամբ, Ուկրաինայի ենթակառուցվածքների նախարար Անդրեյ Պիվովարսկին հայտարարել է, որ փետրվարի 20-ին վերջնական արձանագրությունն է կնքվելու Բաքվում, որտեղ ճշգրտվելու են տեխնիկական բոլոր հարցերը, իսկ մարտ ամսից արդեն կսկսվեն տարանցիկ երկաթուղային երթուղով փոխադրումները դեպի ասիական երկրներ:
Նշվում է, որ երկաթգիծը փորձարկելու համար ուկրաինական փորձնական բեռնատար գնացք էր ուղարկվել Ուկրաինա-Վրաստան-Ադրբեջան-Ղազախստան-Չինաստան երթուղով, շրջանցելով Ռուսաստանը, և փետրվարի 2-ին ժամանել է սահմանված վայր:
Փորձնական գնացքը՝ բաղկացած 20 վագոնից, Ուկրաինայի Իլյիչևսկ նավահանգստից Սև ծովով ուղևորվել էր դեպի Բաթումի, այնտեղից երկաթգծով Ադրբեջանի Ալյաթ նավահանգիստ, ապա Կասպից ծովով՝ ղազախական Աքթաու նավահանգիստ, այնուհետև ղազախաչինական սահմանի Դոսթիք անցակետ:
