«Երևանի էլեկտրատրանսպորտ» ՓԲԸ-ի հաշվեկշռում առկա է 79 տրոլեյբուս (1-ը` տեխօգնության), այդ թվում՝ 9 հատ «Ռենո» , 34` «Շկոդա» և 36 «ԼԻԱԶ» մակնիշների։ Ընկերությունն սպասարկում է տրոլեյբուսային 5 երթուղի, օրական գիծ է դուրս բերվում, միջին հաշվով 50-52 միավոր շարժակազմ։
Երևանի վերգետնյա էլեկտրատրանսպորտի գործունեության վերջին մի քանի տարիների վերլուծությունը ցույց է տվել, որ որոշակիորեն ավելացել է տրոլեյբուսներով տեղափոխվող ուղևորների թիվը։ Մասնավորապես, 2012թ. ևս տրոլեյբուսներով իրականացվող ուղևորափոխադրումներում արձանագրվել է որոշակի աճ (0.5 %-ով), տեղափոխվել է 5358.7 հազ. ուղևոր, ինչը 26.6 հազ. ուղևորով ավելի է 2011թ. համեմատ։ Չնայած այդ հանգամանքին, դեռևս փոքր է տրոլեյբուսներով տեղափոխվող ուղևորների տեսակարար կշիռը ներքաղաքային ընդհանուր ուղևորափոխադրումներում (մոտ 2.4%) ։
Կարևորելով քաղաքային վերգետնյա էլեկտրատրանսպորտի նշանակությունը` 2006-ից վերականգնվել է «Երևանի էլեկտրատրանսպորտ» ՓԲԸ-ի սուբսիդավորումը ՀՀ պետբյուջեից։
Չնայած 2012թ. տրոլեյբուսային հավաքակազմը չի համալրվել նոր տրոլեյբուսներով, որոշակի աշխատանքներ են կատարվել վերգետնյա էլեկտրատրանսպորտի շարժակազմի, հպակային և մալուխային ցանցերի, քարշի ենթակայանների նորոգման, հպակային ցանցի որոշակի նոր հատվածներ կառուցելու, քարշի ենթակայանների վերակառուցման ու վերագործարկման, տրոլեյբուսային տնտեսության արտադրատեխնիկական վերազինման, ինչպես նաև տրոլեյբուսների շահագործման արդյունավետության բարձրացման ուղղությամբ։
