Գագիկ Ծառուկյանի մամուլի քարտուղար Իվետա Տոնոյանն առաջարկում է չքաղաքականացնել Գագիկ Ծառուկյանի մոր՝ Ռոզա Ծառուկյանի այն միտքը, թե չէր ցանկանա, որ որդին առաջադրվեր 2013-ի նախագահական ընտրություններում:
«Անգամ եթե տիկին Ռոզա Ծառուկյանը նման բան է ասել, ապա դրա մեջ որևէ տարակուսելի և զարմանալի բան չկա: Որպես ծնող նա իր ցանկությունը կամ մտահոգությունն է արտահայտել, և պետք չէ քաղաքականացնել մոր կողմից արտահայտված միտքը», - Tert.am-ի հետ զրույցում ասաց ԲՀԿ ղեկավարի մամուլի քարտուղար Իվետա Տոնոյանը:
Նշենք, որ «Հայկական ժամանակի» այսօրվա համարում Ռոզա Ծառուկյանին հարցրել է, թե չի՞ ցանկանում, որ իր որդին առաջադրվի նախագահի թեկնածու, և ստացել բացասական պատասխան:
Մեկնաբանելով այսօրվա «Հրապարակ» օրաթերթի հրապարակումը, թե «Նաիրիտ» գործարանի ձեռքբերման հավակնորդների թվում է հայտնվել նաև Գագիկ Ծառուկյանի անունը, Իվետա Տոնոյանը նշեց, որ Գագիկ Ծառուկյանի մոտ չի եղել, չկա և չի էլ լինի «Նաիրիտ» գործարանը ձեռք բերելու մտադրություն:
