Գյումրու թիվ 23 դպրոցի տնօրինությունը մայիսյան տոներն արժանավորելու նպատակով կազմել էր միջոցառումների գրաֆիկ, ուր ներկայացված էին զեկուցումներ, ռեֆերատներ, ցերեկույթներ ու բաց դասեր` նվիրված Շուշիի ազատագրման, Մեծ Հայրենականում տարած հաղթանակի և Հայաստանի առաջին հանրապետության ստեղծման տարելիցներին:
Մայիսի 8-ին դպրոցի աշակերտները Ն.Հակոբյանի օգնությամբ ներկայացրին Շուշիի ազատագրմանը նվիրված միջոցառում:
Իններորդ դասարանի աշակերտները դպրոցի տնօրինության, ուսուցիչների և աշակերտների համար ներկայացրին Շուշիի ազատագրման պատմությունից հատվածներ, կատարեցին երգեր` նվիրված արցախյան ազատամարտին, Շուշիի ազատագրմանը, հայ մարտիկներին: Միջոցառման վերջում երեխաները խորհրդանշական խաղաղասիրական երգ կատարեցին` ցանկություն հայտնելով, որ պատերազմ չլինի, և բոլորն ապրեն խաղաղ ու ապահով:
Դպրոցի փոխտնօրեն Հ. Մսրյանը շնորհակալություն հայտնեց երեխաներին և նշեց, որ այսօր մեծ տոն է, մեծ ուրախության օր: «Թեև այսօր մեր աչքերին արտասուք էլ կա, բայց այսօր հաղթանակի օր է», - նշեց նա ու ցանկացավ, որ այսօր, վաղը եւ ամեն օր հայի կյանքում իրար հաջորդեն հաղթանակները: