Սեղմ պատասխանը՝ որպեսզի երկրի անունն արտացոլի այնտեղ ապրող բոլոր ժողովուրդների ինքնանվումը:
Մեր հարևան այս մեծ երկրի բնակիչները հնում նրան Իրան (արիների երկիր) անունն են տվել: Պարսկաստան անվանել են հին հույները` ամբողջ երկրի վրա տարածելով Պարսից ծոցի ափին գտնվող Ֆարս երկրամասի անունը, և նրանցից այդ անունը փոխառել ու գործածել են եվրոպական բոլոր ժողովուրդները: Հենց այս երկրամասում է ապրել այն ժողովուրդը, որը մ.թ.ա. 6-րդ դարում կազմավորել է Աքեմենյանների կայսրությունը, որին նրանք (ինչպես և ավելի ուշ ասպարեզ ելած Սասանյանները) Պարսկաստան են անվանել:
Պարսկաստան անունն ամբողջ աշխարհը գործածել է մինչև 1935 թվականը, մինչև որ Ռեզա շահ Փեհլևին բոլոր պետություններից պահանջել է իր երկիրն Իրան անվանել:
Ըստ որոշ տեղեկությունների` այս նախաձեռնությունը բխել է Գերմանիայում Իրանի դեսպանից: Ասում են, գերմանացիները նրան համոզել են, թե Իրան անունը կընդգծի նրա բնակիչների արիական ծագումը:
Անվանափոխությունից մի քանի տարի անց իրանցի որոշ գիտնականներ քննադատել են այս որոշումը` իրենց տեսակետը հիմնավորելով նրանով, որ Իրան անունը խզում է երկրի կապն իր փառահեղ անցյալի հետ: Նոր շահը` Մուհամմեդ Ռեզա Փեհլևին, 1959 թվականին թույլ է տալիս, որ միջազգային ասպարեզում զուգահեռաբար գործածվեն երկու անունն էլ:
Իսլամական հեղափոխությունը վերջնականապես ընտրում է Իրան անունը:
