Դպրոցը հիմնադրվել է 1983թ.-ին: Հիմնական հանրակրթական է: Նախկինում գտնվել է Շենգավիթի համայնքում, հետո համարը տեղափոխվել է Մալաթիա - Սեբաստիա վարչական շրջանի Բ2 թաղամաս` նորակառույց դպրոցին: 2006թ-ի նոյեմբերի 25-ին դպրոցը անվանակոչվել է ազգային հերոս Մոնթե Մելքոնյանի անունով: Դպրոցում անվանակոչությունը նշվել է մեծ շուքով: Նոյեմբերի 25-ին դպրոցում կազմակերպվեց համադպրոցական միջոցառում, որին մասնակցում էին Մոնթեի զինակից ընկերները, ազգականները և պաշտոնյա այրեր: Դպրոցում ավանդություն է դարձել նոյեմբեր ամիսը համարել Մոնթեին նվիրված ամիս: Մոնթե Մելքոնյանի անվան դպրոցում հայրենասիրական դաստիարակությունը դրված է բարձր հիմքերի վրա: Անց են կացվում դաստիարակչական մեծ նշանակություն ունեցող միջոցառումներ, կատարվում են Մոնթեին և նրա զինակից ընկերներին նվիրված տեսաֆիլմերի դիտում, և որպես ուխտագնացություն կազմակերպվում է մոմավառություն, երթ դեպի «Եռաբլուր»: Դպրոցում պարբերաբար կազմակերպվում են «Մեր մեծերը» խորագրով բազմաթիվ միջոցառումներ: Հայրենասեր մարդկանց անուններով են անվանակոչված հետևյալ դասարանները` 21 – Աշոտ Նավասարդյանի անվան – 2010թ 22 – Վազգեն Սարգսյանի անվան – 2010թ 27 – Անդրանիկ Մարգարյանի անվան- 2010թ 28 – Վահան Զատիկյանի անվան – 2010թ 41 – Ալեք Մանուկյանի անվան- 2008թ 51 - Հրաչյա Մովսիսյանի անվան- 2008թ /Արցախյան պատերազմում զոհված դպրոցի շրջանավարտ/ 52 – Գոռ Ավետիսյանի անվան- 2008թ/Արցախյան պատերազմում զոհված դպրոցի շրջանավարտ/ 61 – Քըրք Քըրքորյանի անվան- 2008թ 71 – Շարլ Ազնավուրի անվան – 2008թ23 – Սամվել Ալեքսանյանի անվան – 2011 թ Մոնթե Մելքոնյանի անվան դպրոցի առաքելությունն է` հայրենասեր և հայեցի դաստիարակված, բարեկիրթ քաղաքացի ձևավորելը: Դպրոցի և´ սաները, և´շրջանավարտները ամենուրեք աչքի են ընկնում իրենց բարեկրթությամբ և հայեցի դաստիարակությամբ` պահպանելով մայրենիի անաղարտությունը: Մոնթե Մելքոնյանի անվան հ.11 դպրոցն ունի իր ուրույն և օրինակելի ձեռագիրը: Դպրոցը հայրենասեր զինվորներ է ուղարկել հայոց բանակ, որտեղից ստացել է հրամանատարների շնորհակալական պատվոգրերը: Բուհերում սովորող շրջանավարտները ևս առաձնանում են իրենց գիտելիքներով և դաստիարակությամբ: Մոնթեականները ամենուրեք տարբերվում են: Տարեցտարի ավելանում է շնորհալիների քանակը, որոնք բարձր են պահում հ.11 դպրոցի պատիվը: Ավագ դպրոցներում սովորող մոնթեականները տարբերվում են իրենց կարգապահությամբ և գիտելիքներով: Դպրոցում սերտ համագործակցում են ծնողական խորհուրդն ու մանկավարժական կոլեկտիվը: Հաշվի են առնվում ծնողների առաջարկություններն ու կարծիքները: Դպրոցում ակտիվ գործունեություն է ծավալում նաև աշակերտական խորհուրդը: Ակտիվ մասնակցություն են ունենում բոլոր միջոցառումներին: Նրանց առաջադրած բոլոր հարցերն ու առաջարկությունները քննարկվում են մանկավարժական խորհրդի նիստում: