Դելիում կախաղան են հանել Մոհամեդ Աֆզալա Գուրուին, որը մահվան է դատապարտվել 2001թ. խորհրդարանի վրա հարձակում կազմակերպելու համար։ Հարձակման հետեւանքով 10 մարդ զոհվել էր։ Բոլոր հինգ հարձակվողները եւս մահացել էին։
Մահվան դատավճռի իրագործումը հետաձգվել էր ներում շնորհելու խնդրանքը ուսումնասիրելու կապակցությամբ, սակայն մի քանի օր առաջ Հնդկաստանի նախագահ Փրանաբ Մուքերջին մերժել էր բողոքարկումը, հայտնում է BBC-ի ռուսական ծառայությունը։
Գուրուն հերքում էր իրեն ներկայացված բոլոր մեղադրանքները, մի քանի իրավապաշտպան կազմակերպություններ պաշտպանում էին նրան՝ դատարանի վճիռն անարդար համարելով։ Երկրում բողոքի ցույցերի մտավախությամբ պայմանավորված՝ խստացվել են անվտանգության միջոցառումները։
