Լեհաստանն ու Պորտուգալիան չեն մասնակցի «Եվրատեսիլ» երգի մրցույթին, որը կանցկացվի Շվեդիայի Մալմյո քաղաքում, 2013թ.-ին։ Պատճառը ֆինանսական դժվարություններն են, հայտնում է «ՌԻԱ Նովոստի» գործակալությունը՝ վկայակոչելով Sky News հեռուստաալիքին։
Պորտուգալիան տնտեսական ծանր ճգնաժամի մեջ է և ստիպված է հետևել բյուջեի դեֆիցիտի կրճատմանն ուղղված խնայողության խիստ միջոցառումներին, ինչպես պահանջում է Եվրոպական Միությունը։
Լեհաստանը, ինչպես նշում է Sky News-ը, չի հասցրել «ուշքի գալ» ֆինանսական ծախսերի բեռից՝ ֆուտբոլի Եվրոպայի առաջնության հյուրընկալման հետ կապված։
Երկրներից և ոչ մեկը երբեք չի հաղթել այս մրցույթում։ Պորտուգալիայի համար լավագույն արդյունքը եղել է 6-րդ տեղը՝ 1996թ.-ին, Իսկ Լեհաստանի համար՝ 2-րդ տեղը՝ 1994թ.-ին։
«Եվրատեսիլ-2013»-ը կանցկացվի մայիսի 14-18-ը։ Շվեդիան մրցույթը կհյուրընկալի արդեն 5-րդ անգամ. վերջին անգամ երկրին հաղթանակ է բերել երգչուհի Լորինը՝ Euphoria երգով։
