«Ի՞նչ օգուտ, եթե մեկին մերկացնես և մեկ ուրիշին հագցնես»
 Եվս մեկ փունջ Հովհան Ոսկեբերանի մտքերից *** *** Հեթանոսներին քրիստոնյա են դարձնում ոչ այնքան հրաշքները, որքան քրիստոնյաների կյանքը: Երբ քարոզչությունը դեռ տարածված չէր, հրաշքները, արդար լինենք, զարմանքի առարկաներ էին, իսկ հիմա պետք է կյանքով զարմացնել: *** Ի՞նչ օգուտ, եթե մեկին մերկացնես և մեկ ուրիշին հագցնես: Ողորմությունը պետք է բխի կարեկցանքից, իսկ մեկից կողոպտածը մեկ ուրիշին տալը տմարդություն է: Եվ եթե մենք ուրիշներից հափշտակած ամեն ինչ նույնիսկ տանք, դրանից մեզ ոչ մի շահ չի լինի: Դա ցույց է տալիս Զաքէոսը, որն այն ժամանակ Աստծու գութը շարժեց, երբ խոստացավ վերադարձնել հափշտակածի քառապատիկը (Ղուկաս 19: 8): Իսկ մենք, շատ ավելին հափշտակելով ու տալով քիչը, մտածում ենք Աստծու ողորմածությանն արժանանալ՝ չիմանալով, որ դրանով իսկ էլ ավելի ենք զայրացնում Նրան: *** Եկեղեցի մտնելուց առաջ մենք լվանում ենք մեր ձեռքերը, իսկ ինչո՞ւ չենք լվանում մեր մեր սիրտը: *** Ձեռքերդ հեռու պահիր կաշառակերությունից և այդժամ միայն դրանք կարկառիր ողորմություն տալու: Եթե մենք այդ նույն ձեռքերով մեկի հագուստը խլելու ենք և մեկ ուրիշին հագցնենք, ապա...ողորմությունը ցանկացած հանցագործության առիթ կլինի: Ավելի լավ է գթասրտություն չցուցաբերել, քան այդպիսի գթասրտություն ցուցաբերել: *** Ամաչի՛ր մեղք գործել, բայց մի՛ ամաչիր ապաշխարել: *** Սատանան այլասերել է բնական կարգը. նա մեղքին հանդգնություն է տվել, իսկ ապաշխարությանը՝ ամոթի զգացում: *** Սիրողին բավ է և այն պարգևը, որպեսզի սիրի, ում սիրում է: *** Ոչ թե գինին է չարիք, այլ հարբեցողությունը: *** Դու այստեղ պանդուխտ ես և եկվոր, քո Հայրենիքը երկնքում է: *** Ի՞նչ է մահը: Նույնն է, ինչ հագուստն հանելը. մարմինը նման է հագուստի, զգեստավորում է մարմինը, և մենք մահվան միջոցով այն կարճ ժամանակով հանում ենք մեր հագից, որպեսզի այն վերստին ստանանք պայծառացած տեսքով: Ի՞նչ է մահը: Ժամանակավոր ճանապարհորդություն, քուն, որը սովորական քնից երկարարատև է: *** Ոչ թե ողբա մահացածի համար, այլ ողբա մեղքերի մեջ ապրողի համար: *** Զրկվե՞լ ես մի բանից: Մի՛ վշտանա: դրանից օգուտ չկա: Մե՞ղք ես գործել: Վշտացիր՝ դա օգտակար է: *** Չենք ասում, թե իբր ամեն չարը նրանից է, որ ուտում ենք ու խմում. չարը դրանցից չէ, այլ մեր անհոգությունից ու ագահությունից: Սատանան ո՛չ կերել է, ո՛չ խմել, բայց ընկել է, իսկ Պողոսը կերել է ու խմել և երկինք է տեղափոխվել: *** Մի՞թե տարօրինակ չէ, որ երկինքը երկրից շատ ավելի լավն է համարվում, բայց այնտեղ վերաբնակվածների համար ողբում են: *** Ամուսնանալը կամ չամուսնանալը մեզանից է կախված, իսկ այն, ինչը հաջորդում է ամուսնությանը, այլևս մեր իշխանության ներքո չէ, բայց կամա, թե ակամա պետք է դիմանալ ստրկությանը: *** Դեռևս խոնարհամտություն չէ, երբ մեղք գործածն իրեն մեղսական է համարում: Խոնարհամտությունն այն է, որ մարդը, գիտակցելով հանդերձ, որ ինքը շատ մեծ գործեր է արել, երբեք չմտածի, թե ինքը մեծ է: *** Քո պարգևն առավել մեծ կլինի, երբ դու անես այն, ինչն անհրաժեշտ է՝ առանց պարգևատրման ակնկալիքի: *** Մահվանից առաջ Հովհան Ոսկեբերանն ասել է. «Փառք Աստծուն ամեն ինչի համար»: |
