Մի ինքնահավան մարդ Քրիստափոր Կոլումբոսին ասել է.
-Այդ ի՞նչ մի առանձնահատուկ բան ես արել: Ասենք թե նավարկել ես: Ես էլ կարող էի նավարկել: Ինչ-որ բա՞ն ես հայտնագործել: Դե ես էլ կարող էի հայտնագործել…
Կոլումբոսը չի վիճել այդ մարդու հետ և չի փորձել ապացուցել իր կատարածի կարևորությունը: Նա պարզապես մի խաշած հավկիթ է վերցրել ու իր մեծամիտ զրուցակցին խնդրել է հավկիթը սեղանին ուղղահայաց դիրքով այնպես դնել, որ այն չընկնի: Զրուցակիցը մի քանի անգամ փորձել է, բայց արդյունքի չի հասել. հավկիթը «նախընտրել է» պառկած դիրքը: Այդժամ Կոլումբոսը հավկիթի կլորիկ մասը թեթևակի խփել է սեղանին, կոտրել է ու հավկիթը կանգնեցրել է կոտրված կճեպի վրա:
-Այդպես ե՛ս էլ կարող եմ, - քամահրական տոնով ասել է մեծամիտը:
-Իհարկե՛, կարո՛ղ ես, - պատասխանել է Կոլումբոսը: - Միա՛յն թե դա, բնականաբար, կլինի ինձանից հետո: