Պե՛տք չէ ինձ փնտրել սուրճի բաժակի
թանձր մրուրում…
Դու ինձ ման արի հորձանուտներում, որտեղ որ երբե՛ք
Դադար չի լինում:
Պե՛տք չէ գրբացի ձեռքերին նայել,
խաղաքարտերում ես վաղո՜ւց չկամ,
Դու ինձ ման արի զգացմունքներում, որտեղ ետդարձի
Ճանապա՛րհ չկա:
Դու ինձ մի՛ փնտրիր անցորդների մեջ,
անցորդ չեմ եղել ես պատահական,
Դու ինձ ման արի քո՛ երազներում, որտեղ որ
հյուր եմ եղել մշտական:
Ու բա՛վ է վանքի հատակը մաշես,
բա՛վ է ինձ համար Դու մոմեր վառես,
Ես ուրվական չեմ, ես մա՛սնիկն եմ քո ու
սպասում եմ, որ աչքերդ բացես:
Ինձ փնտրիր սիրո թա՜նձր լուծույթի ալիքների մեջ
Շփոթվա՜ծ, կորա՜ծ,
Դու ինձ ման արի քո՛ մեջ,
քո՛ սրտում,
ինչո՞ւ ես կանգնել
այդպես մոլորված…