Ամեն ընտրությունից հետո դուք ավելի վատ եք ապրում, բայց դաս չեք առնում, վերջապես դաս քաղեք եղածից
12:22, Thursday, 02 May, 2013
 ՀՅԴ բյուրոյի ներկայացուցիչ Վահան Հովհաննիսյանը Էրեբունի վարչական շրջանի Ազատամարտիկների այգում նախընտրական հանդիպման եկածներին փորձեց բացատրել, որ Երևանի ավագանու խորհուրդը դա փոքր խորհրդարան է, ուստի յուրաքանչյուր ավագանի պարտավոր է իր ընտրողի կողքին լինի, երբ ասենք՝ վերելակ է ընկնում կամ խողովակ վնասվում, ինչն այդպես չէ՝ ոչ մի տեղ ոչ մի ավագանու դեմքի գույնը չգիտեն: Ըստ Հովհաննիսյանի՝ սրա պատճառը ոչ թե այնքան անձի մեջ է, այլ՝ ընդհանուր դրվածքի. «Մի քանի օր առաջ հեռուստատեսությամբ խոսում էր մի երիտասարդ՝ մազերը վազելինով լպստած, ապուշ-ապուշ մտքեր էր հայտնում այն մասին, թե իբր Երևանի բնակչության մեծ մասը չի ուզում այս ընտրությունները տեսնել որպես քաղաքական, այլ ուզում է լավ կառավարում: Չի հասկանում մարդը, որ լավ կառավարումը նշանակում է ճիշտ քաղաքականություն: Եթե դու ընտրել ես մի կուսակցության, որը 20 տարի շարունակ ձախողում է, չկարծեք, թե հիմա իրենք կհաջողեն: Եթե դուք ձայնը տվել եք իշխող կուսակցությանը, չասեք՝ չենք տվել, նկարել են, դա ոչ մի նշանակություն չունի, ձեր կյանքը վատանում է, դուք դժգոհում եք, կորցնում եք աշխատանքը և թողնում գնում Հայաստանից: Ցավն այն է, որ ամեն ընտրությունից հետո դուք ավելի վատ եք ապրում, բայց դաս չեք առնում: Վերջապես դաս քաղեք եղածից: Չի կարելի 10 հազար դրամով, ինչ-որ մի խառոշիի դեմքից վախենալով մեր երկրի ճակատագիրը լուծենք և էս երկիրը խաղալիք դարձնեք: Խաղալիք չի էս երկիրը»:
Իր հերթին ՀՅԴ խմբակցության անդամ Արծվիկ Մինասյանը ուսուցչին խոստացավ վերադարձնել կորցրած արժանապատվությունը, իսկ երևանցիներին՝ իրենց արժանապատիվ ուսուցիչներին: Տնտեսագետ-օրենսդիրը վստահեցրեց նաև, որ քաղաքային իշխանությունն իրենց ձեռքն վերցնելուց հետո թույլ չեն տալու, որ օլիգարխները զավթեն հանրային տարածքները, իսկ գծատերերը երթուղայինի վարորդներից շորթած գումարները միայն իրենց գրպանը դնեն: «Ոչ մի կոպեկ այդ գումարից չի մտնում պետական բյուջե: Այդ գումարի առնվազն 50 տոկոսը բերելու ենք բյուջե: Կամ ինչ է կատարվում աղբահանության ոլորտում՝ մեկ շնչի հաշվով 200 դրամ գումար են գանձում, բայց աղբն էլ ժամանակին չեն տանում: Երբ դուք էս գլխից գումարը տալիս եք, նրանք շահագրգռվածություն չունեն աղբը ժամանակին հավաքելու, ուստի մենք ասում ենք, որ ապրանքի գնի մեջ պետք է մտնի աղբահանության գումարը: Օրինակ, սիգարետը որ գնում եմ, 1 դրամը պետք գնա աղբահանությանը, որ ես տուփը նետեմ, այն պարտավոր լինեն հավաքելու: Իրականում մեր ասածին հակափաստարկներ չեն գտնում, իսկ երբ գտնում են, չկա որևէ տրամաբանություն: Մենք պնդում ենք, որ 1 մլրդ դրամի եկամուտ հնարավոր է ապահովել, ասում են՝ ի՞նչ եք ասում, եթե այդքան բյուջե ունենանք, մարզերի ժողովուրդը կգա Երևան: Մեկը չկա ասի՝ այ ախմախներ, դուք ասում եք՝ Երևանը թող աղքատության մեջ տառապի, որ մարզերից չգա՞ն Երևան: Հերիք է թողնենք, որ մեր արյունը ծծեն: Այս անգամ վստահեք ՀՅԴ-ին՝ մեր պապերի կուսակցությանը՝ հստակ իմանալով, որ ՀՅԴ-ին վստահողը չի սխալվում: ՀՅԴ-ին չհավատացողն է, որ լքում է մեր երկիրը», - ասաց Արծվիկ Մինասյանը: Դաշնակցական պատգամավորը Էրեբունցիներին հիշեցրեց նաև իրենց ընկերոջ՝ Պռոշյանի գյուղապետ Հրաչ Մուրադյանի սպանությունը՝ պնդելով, որ դրանով մարտահրավեր նետվեց մեր արժանապատվությանը, քանզի ազատամարտիկ- գյուղապետը զոհ գնաց տեսակների պայքարին: HayNews.am |
Like
0
Dislike
0
3120 | 0 | 0 | 0
