«Ասենք ոչ վատ սովորություններին, վարենք առողջ ապրելակերպ» . այս և վնասակար սովորությունների դեմ ուղղված այլ կոչերի ներքո անցավ դեկտեմբերի 2-ին Սոլակի միջնակարգ դպրոցում կազմակերպված միջոցառումը:
Միջոցառման մասնակիցները դատում էին վնասակար սովորույթները` ծխախոտի, ալկոհոլի և թմրամիջոցների օգտագործումը:
Հնչեցին կանաչ օձին` ալկոհոլին, այնուհետև ծխախոտին, հետո նաև սպիտակ մահվանը` թմրամիջոցներին, ուղղված մեղադրանքները: Մեղադրանքի վկաները` Սիրտը, Ուղեղը, Լյարդը և Թոքերը պատմեցին այն անդառնալի հետևանքների մասին, որոնց բերում են ծխախոտի, ալկոհոլի և թմրամիջոցների օգտագործումը: Նման անվիճելի վկայություններից հետո դատավորի որոշումը միանշանակ էր` մեղավոր են: Որպես վնասակար սովորությունները շրջանցելու դեղատոմս՝ դատավարության մասնակիցները խորհուրդ տվեցին հետևել առողջ ապրելակերպի կանոններին` զբաղվել սպորտով, ակտիվ գործունեություն ծավալել, սովորել, սրտին հաճո զբաղմունք գտնել: Մի խոսքով լցնել այն բացը, որը սովորաբար շտապում են զբաղեցնել վնասակար սովորությունները, որովհետև, ինչպես հնչեց դատարանում` մարդկային արատները հիմնականում «պարապ ուղեղի» արդյունք են:
