Ֆաշիստական Գերմանիայում ժողովրդի մեջ տարածված է եղել «Dolchstoßlegende» ( «Դաշույնով թիկունքին հարվածի մասին լեգենդ» ) արտահայտությունը, որի համաձայն Առաջին համաշխարհային պատերազմի մարտադաշտերում գերմանական բանակն անպարտելի կմնար, եթե 1918 թվականի նոյեմբերին տեղի ունեցած հեղափոխության արդյունքում իշխանություն ձեռք բերած քաղաքացիական անձինք չդավաճանեին: Նացիստական քարոզիչներն այս կերպ կարողացել են հայտարարել, թե գերմանական բանակը կարողացել է պաշտպանել երկիրը և անձնատուր չի եղել, և որ պատերազմում պարտության մեղավորը միայն ու միայն պետության ղեկին հայտնված քաղաքացիական անձինք են եղել:
«Dolchstoß» եզրույթն առաջին անգամ գործածվել է 1918 թվականի դեկտեմբերի 17-ին՝ շվեյցարական գերմանալեզու «Neue Zurcher Zeitung» օրաթերթում, որն այն քաղել է բրիտանացի գեներալ Ֆրեդրիկ Բարտոն Մորիսի հետևյալ արտահայտությունից.
«Ինչ վերաբերում է գերմանական բանակին, ընդհանուր կարծիք արտահայտած կլինեմ, եթե ասեմ, որ նրան թիկունքից դաշույնով հարավածել է քաղաքացիական բնակչությունը»:
