Խնդրում ենք սպասել...

Հոդվածներ

Նախաճաշից հետո Յունգն ամուսնացել է մի կնոջ հետ, ճաշից առաջ՝ մեկ ուրիշ կնոջ հետ, ճաշից հետո՝ երրորդի, իսկ ընթրիքի ժամին՝ չորրորդ կնոջ հետ

12:20, չորեքշաբթի, 10 մարտի, 2021 թ.
Նախաճաշից հետո Յունգն ամուսնացել է մի կնոջ հետ, ճաշից առաջ՝ մեկ ուրիշ կնոջ հետ, ճաշից հետո՝ երրորդի, իսկ ընթրիքի ժամին՝ չորրորդ կնոջ հետ

Այդ ժամանակաշրջանում էր, որ Բրիգհամ Յունգը՝ մորմոնների նոր առաջնորդը, իր հետևորդների միջավայրում, պաշտոնական որոշմամբ, բազմակնություն է հաստատել: Ի քաջալերումն իր սահմանած նոր կացութաձևն ընդունողների՝ նա հիշեցրել է Մորմոնի հրեշտակի պատգամը, թե «մարդը որքան շատ ազգականներ ունենա այն աշխարհում, այնքան նրա կյանքն այնտեղ քաղցր կլինի»:

Այս կարգախոսը հանգեցրել է անբնական ամուսնությունների: Մի տղամարդ միևնույն օրն ամուսնացել է և՛ մոր, և՛ նրա դստեր հետ: Մեկ ուրիշն իր նշանածի խնդրանքով ամուսնացել է նրա երեք քույրերի ու նրանց տատիկի հետ: :

Մի երիտասարդ տղամարդ, որն արդեն երկու կին ուներ, առաջին կնոջը գոհացնելու համար երրորդին է տուն բերում: «Առաջին կինս արդեն ծերացել էր, - ասել է այդ տղամարդն իր ընկերոջը, - նա տնային գործերում իրեն օգնող երիտասարդ կնոջ կարիք ուներ»:

Ինչ խոսք, այդպիսի ամուսնությունները հաճախ վոդեվիլային իրավիճակների են հանգեցրել: Օրինակ՝ այս համայնքում երկու՝ իրար շատ մտերիմ երիտասարդ աղջիկներ են եղել, որոնք քանի որ ցանկացել են անբաժան լինել, նշանվել են նույն տղամարդու հետ, որը նրանց հետ ամուսնացել է նույն արարողակարգով:

Իսկ Բրիգհամ Յունգն ամուսնացել է 27 կնոջ հետ, որոնք նրանից ծնել են 56 երեխա՝ 31 աղջիկ և 25 տղա:

Յունգի կյանքի առավել արտասովոր օրը, անկասկած, եղել է այն օրը, երբ նա նախաճաշից հետո ամուսնացել է մի կնոջ հետ, ճաշից առաջ՝մեկ ուրիշ կնոջ հետ, ճաշից հետո՝ երրորդի, իսկ ընթրիքի ժամին՝ չորրորդ կնոջ հետ:

Բայց Բրիգհամը հաճախ խնդիրների է բախվել: Երբ մի դերասանուհի հյուրախաղերի է եղել Սոլթ Լեյք Սիթիում, Յունգն ու իր հետևորդներից երեքը սիրահարվել են նրան: Յունգն իր մոտ է կանչել մրցակիցներին ու գլխներին հանգամանալի քարոզ է կարդացել: Այդ քարոզի «մեխը» Յունգի հրեշտակի «հայտնությունն» է եղել: Հրեշտակը գիշերն այցելել է նրան ու հանձնարարել, որ ամուսնանա այդ դերասանուհու հետ: Հետևորդները, բնականաբար, ներողություն են խնդրել ու ընկրկել են, և դերասանուհին դարձել է Յունգի 22-րդ կինը:

Այս կենսակերպը քննադատվել է ու ծաղրի ենթարկվել: Մի անգամ Յունգն իր ընկերներից մեկին հարցրել է, թե նա քանի երեխա ունի: Ընկերը չի կարողացել մտաբերել, և Յունգը բոլոր ընտանիքներին կարգադրել է ունենալ ամուսնությունների ու երեխաների մատյան:

Բայց 1890 թվականին մորմոնների եկեղեցու գլխավորը ստիպված է եղել արգելել բազմակնությունը, բայց դա չի խանգարում, որ այսօր էլ որոշ մորմոններ մի քանի կին ունենան:

Մորմոնների համայնքում, սակայն, լավ երևույթներ, ապրելակերպի ճիշտ նորմեր էլ կան: Նրանք խստորեն պահպանում են առողջ ապրելակերպի կոդեքսը և ձեռնպահ են մնում ոգելից ըմպելիքներից, ծխախոտից, սուրճից, թեյից և այն ամենից, որոնք մարդուն կախվածություն են ենթարկում: Նրանց համար շատ կարևոր են ընտանեկան արժեքները, սերունդների, մերձավոր և հեռավոր հարազատների ու բարեկամների միջև սերտ կապերի պահպանումը:

Երկուշաբթի օրերին նրանք կազմակերպում են ընտանեկան երեկույթներ, շաբաթը մեկ անգամ՝ 12-ից 18 տարեկան երիտասարդների երեկույթներ: Նրանց գործունեության ու կյանքի կարևոր բաղադրիչներն են հասարակական աշխատանքը, բարեգործությունը, մարզական խաղերը, դասերը, պարերը: Ամիսը մեկ անգամ նրանք կազմակերպում են գթասրտության երեկույթներ:

Եթե 1971 թվականին մորմոնների ընդահանուր թվաքանակը ամբողջ աշխարհում կազմել 3 միլիոն 100 հազար, ապա 2020 թվականին՝ ավելի քան 16 միլիոն:
     Նկարում՝ մորմոնների տարածվածության քարտեզը

Առաջխաղացնել այս նյութը
Տեղեկացնում ենք, որ նյութը հրապարակվել է "Մամուլի խոսնակ" նախագծի շրջանակներում:
Գրանցվի՛ր և հրապարակի՛ր քո հոդվածները:
Հավանել
0
Չհավանել
0
| | |
2779 | 0 | 0
Facebook
COMMENT.am