ԵՊՀ-ում գործող մշակութային ակումբները համախմբելու, արտալսարանային բովանդակալից ժամանց կազմակերպելու, գեղագիտական բարձր ճաշակ ձևավորելու և Մայր բուհի վարկանիշին համահունչ միջոցառումները բարձր չափանիշներով անցկացնելու նպատակով 2006 թվականին ԵՊՀ-ում կազմավորվեց Մշակույթի կենտրոնը՝ Կարինե Դավթյանի ղեկավարությամբ։
Կենտրոնն իրականացնում է բազմաբնույթ մշակութային ծրագրեր, կազմակերպում հանդիպումներ անվանի մարդկանց հետ, ինչպես նաև մասնակցում է հանրապետական և միջազգային մրցույթ-փառատոներին, ԵՊՀ-ն հյուրախաղերով ներկայացնում ինչպես ՀՀ մարզերում, այնպես էլ արտերկրում:
Այս տարի ԵՊՀ Մշակույթի կենտրոնը նախաձեռնել է «Մշակութային դաստիարակություն» մեկամսյա ծրագիրը, որի շրջանակներում կազմակերպվելու են հանդիպումներ մշակույթի գործիչների հետ, վարպետության դասեր, դասախոսություններ, ֆիլմների դիտում-քննարկումներ, այցելություններ կարևոր մշակութային հաստատություններ, ինչպես նաև հաշվի է առնվելու մասնակցությունը Մշակույթի կենտրոնի կողմից կազմակերպվող ներհամալսարանական և հանրապետական միջոցառումներին:
Մայիսի 17-ին կենտրոնի դահլիճում տեղի ունեցավ հանդիպում «Տերյան» մշակութային կենտրոնի տնօրեն, Խ. Աբովյաի անվան պետական մանկավարժական համալսարանի դասախոս, արվեստագիտության թեկնածու ԼԻԼԻԹ ՄԵԼԻՔՅԱՆԻ հետ: Դասախոսության թեման է «Տարազը և հայ կինը»:
Հանդիպման ընթացքում Լիլիթ Մելիքյանը խոսես իր գործունեության մասին, ինչպես նաև տարազի նշանակության, զարդանախշերի խորհրդաբանության, ճիշտ հագուստի ընտրության կարևորության մասին:
Այսօր՝ մայիսի 19-ին հանդիպում կայացավ ՀՀ վաստակավոր արտիստ Սամվել Բաղինյանի հետ՝ «Հայ դասական պոեզիան որպես ազգային արժեք. Չարենց 120» դասախոսությամբ։
Կենտրոնն ակտիվորեն ներգրավված է նաև ԵՊՀ տարբեր ստորաբաժանումների կողմից իրականացվող հանրային նշանակություն ունեցող միջոցառումների կազմակերպման աշխատանքներում՝ ապահովելով դրանց ոչ միայն մշակութային մասը, այլև սցենարական և ռեժիսորական մտահղացումները: