Ադրբեջանի զինված ուժերում եւս երկու արտակարգ պատահար է գրանցվել, որոնցից մեկը` մահվան ելքով:
Ինչպես հաղորդում է APA-ն, շփման գծում (ուղղությունը չի նշվում) ականի վրա պայթել է շարքային Իբրահիմ Հեյդարովը: Ծանր վիրավոր զինվորը տեղափոխվել է հիվանդանոց:
Երկրորդ միջադեպը գրանցվել է Թարթառի շրջանի N-րդ զորամասում, որտեղ շարքային Օրհան Միրզազադեն ինքնասպան է եղել` կրակելով իր տաբելային զենքից:
Միաժամանակ, ադրբեջանական գործակալության բերած ժլատ տեղեկությունները մտորելու տեղի են տալիս: Ի՞նչ էր անում Իբրահիմ Հեյդարովը շփման գծի մոտ գտնվող ականապատված հատվածում: Չի բացառվում, որ զինվորը ինքնակամ լքել է զորամասը քաղցի կամ ոչ կանոնադրական հարաբերությունների պատճառով: Իսկ առավել հնարավոր է, որ զինվորական հանձնարարություն է կատարել:
Վերջին ժամանակներս ադրբեջանական կողմը ակտիվացրել է գործունեությունը շփման գծում, արձանագրվել են դիվերսիայի դեպքեր: Շատ հավանական է, որ այդ դեպքը հերթական դիվերսիայի անհաջող փորձերից մեկն է: Այդ վարկածը հաստատում է «ինքնասպանության» միջադեպը: Բացառված չէ, որ մահացածը մասնակցել է ձախողված գործողությանը: