1830-ական թվականներին ամերիկյան և եվրոպական պարբերականների զարգացման նոր միտումը դարձավ բնակչության ամենաաղքատ խավի նվաճումը՝ որպես նոր ընթերցողական լսարանի: Այդ նվաճումը պայմանավորված էր մամուլի` բոլորովին նոր տեսակի առաջացմամբ: Նոր տեսակը ուներ ամենացածր գինը և շահավետ էր` ունենալով ամենաշատ տպաքանակը:
19-րդ դարում ԱՄՆ-ում արդեն ամենաաղքատ խավը ուներ թերթ կարդալու անհրաժեշտություն, բայց նրանց ֆինանսական ռեսուրսները թույլ չեին տալիս ձեռք բերել այդ թերթերը: Խնդիրը սակայն միայն բարձր գինը չէր, նաև անմատչելի գրելաոճն ու բովանդակությունը: Այս պայմաններում առաջացավ մամուլի նոր տեսակ: Տպագրության մշակույթի զանգվածայնությունը և էժան հրատարակությունները այդ տեսակի բնորոշիչներն էին և դրանք հայտնի դարձան փեննի պրեսս՝ գրոշանոց մամուլ անունով:
