Այսօր՝ մայիսի 7-ին, ավտովթար-վրաերթ է տեղի ունեցել Երևանում:
Ժամը 21: 00-ի սահմաններում Ճանապարհային ոստիկանության օպերատիվ կառավարման կենտրոն ահազանգ է ստացվել, որ Կասյան 7 հասցեի մոտից «Արմենիա» բժշկական կենտրոն են տեղափոխվել Կոմիտաս 1 շենքի բնակիչներ 38-ամյա Նադեժդա Բաղրամյանը և 5-ամյա Դավիթ Բունիաթյանը:
Ինչպես հայտնում է ֆոտոլրագրող Գագիկ Շամշյանը, ՃՈ օպերատիվ կառավարման կենտրոնից ռադիոկապով ավտովթար-վրաերթի մասին տեղակացրել են նշված վայրում ծառայություն կատարող Երևանի Ճանապարհային ոստիկանության աշխատակիցներին, որից հետո նշված վայր է ժամանել Ոստիկանության Քննչական գլխավոր վարչության Երևանի քննչական վարչության Ճանապարհատրանսպորտային հանցագործությունների քննության բաժնի ավագ քննիչ Աշոտ Ասատուրյանը:
Տեղում էին նաև Ոստիկանության Արաբկիրի բաժնի օպերատիվ խումբը:
Ֆոտոլրագորղը հայտնում է՝ պարզվել է, որ Կասյան փողոցում «Opel» մակնիշի՝ 33 VU 414 համարանիշի ավտոմեքենայի վարորդը բախվել է իր առջև կայանված «Samand» մակնիշի՝ S 7696 համարանիշի ավտոմեքենային, որից հետո էլ «Samand» -ը ինքնաբերաբար առաջ է ընթացել և վրաերթի ենթարկել հետիոտնի համար նախատեսված մասով անցնող Ն. Բաղրամյանին և Դ. Բունիաթյանին:
Գ. Շամշյանը հայտնում է, որ 5-ամյա երեխան «Արմենիա» բժշկական կենտրոնից տեղափոխվել է «Սուրբ Աստվածամայր» բժշկական կենտրոն:
