Վաճառքում գրեթե գոյություն չունի խոհանոցային սպասքը լվանալու որևէ միջոց, որի գործածումից ձեռքերի մաշկը չթորշոմի, որը վնասակար ազդեցություն չունենա առողջության վրա (քանի որ դրանց բաղադրության մի մասն ափսեի մակերեսից հաստատապես անցնում է սննդին, որովհետև նույնիսկ տևական լվանալու դեպքում, այն չի անհետանում):
Խանութներում վաճառվող աման լվանալու հեղուկներում մեծ քանակությամբ քիմիական ագրեսիվ նյութեր կան, որոնք դանդաղ ու շարունակաբար քայքայում են մեր մարսողական համակարգը:
Ովքեր չեն ուզում այդպիսի արտադրանք գործածել, կարող են շատ հասարակ ու անվտանգ նյութերից հենց տանը պատրաստել սպասքը լվացող, սալիկներն ու լվացարանակոնքը մաքրող արդյունավետ հեղուկ:
Այդ անվտանգ հեղուկը պատրատելու համար հարկավոր են՝ 100 գրամ ցանկացած տեսակի օճառ (տնտեսական, մանկական, կոսմետիկական), ճաշի երկու գդալ կերակրի սոդա, 100 գրամ եռացրած ջուր և 3 կաթիլ ցանկացած բուրավետ յուղ:
Նախ՝ անհրաժեշտ է մանր քերիչով օճառը քերել, ապա քերուկի վրա լցնել եռման ջուրը և երկար խոզանակով այնքան խառնել, որ փրփրուն զանգված գոյանա: Այնուհետև հարկավոր է լուծույթին վերը նշված քանակության սոդա և բուրավետ յուղ խառնել՝ շարունակելով ամբողջը հարել: Պաղելուց հետո ամբողջը լցրեք շշի մեջ և օգտագործեք:
