Մեքքայի Ալ Հարամ մզկիթ. սա մահմեդական աշխարհի ամենագլխավոր և ամենամեծ մզկիթն է, որի ներքնաբակում գտնվում է իսլամի գլխավոր սրբությունը՝ Քաաբը: Մզկիթը միաժամանակ կարող է ընդունել 820 հազար հավատացյալ: Այն հիմնադրվել է 638 թվականին:
Մաջիդ ան Նաբավի (Մարգարեի) մզկիթ. գտնվում է Մեդինայում, համարվում է իսլամական աշխարհի երկրորդ սրբավայրը: Հիմնադրվել է 622 թվականին և ընդարձակվել է 1925-ին: Այս մզկիթը եղել է Մուհամմեդի վերջին հանգստավայրը: Սա կարող է ընդունել 730 հազար մարդ:
Իսթիքլալ (Անկախության) մզկիթ. գտնվում է Ինդոնեզիայի մայրաքաղաք Ջակարտայում, կառուցվել է ի նշանավորումն երկրի անկախության հռչակման՝որպես երախտագիտության տուրք Աստծուն: Կարող է ընդունել շուրջ 120 հազար հավատացյալ:
Բադշահի (Փադիշահի) մզկիթ. գտնվում է Պակիստանի Լահոր քաղաքում: Կառուցվել է 1673 թվականին և մինչև 1986 թվականը եղել է մուսուլմանական աշխարհի երկրոդ մեծ մզկիթը: Կարող է ընդունել 110 հազար հավատացյալ:
Հասան 2-րդի մզկիթ (Մարոկկոյի Կասաբլանկա քաղաքում) . կառուցվել է 1993 թվականին: Այս մզիթի մինարեթն ամենաբարձրն է աշխարհում (210 մետր): Մզկիթի կառուցման վայրի ընտրությունը Հասան 2-րդին ներշնչել է Ղուրանի այն սուրահը, որն ազդարարում է, թե «Ալլահի գահը ջրերի վրա է կառուցված» (մզկիթի ամբողջ շինության կեսը ջրի մակերեսին է, իսկ դրա մի հատվածն ապակեպատ է, որպեսզի հավատացյալները կարողանան ծնկի գալ ուղղակի ջրերին): Մզկիթը միաժամանակ կարող է ընդունել 105 հազար մարդ:
Ջամա (Մայր) մզկիթ (գտնվում է Հին Դելիում): Հիմնադրել է Թաջ Մահալը կառուցած Շահ Ջահանը, կառուցումն ավարտվել է 1656-ին: Մզկիթի ներքնաբակում կարող է տեղավորվել 25 հազար մարդ, իսկ մզկիթում՝ 85 հազար: Այս մզկիթում է գտնվում եղջերվի կաշվից պատրաստված մագաղաթով կազմված ամենահին Ղուրանը: Մզկիթն ունի երեք դարպաս և երկու մինարեթ:
Ֆեյսալ թագավորի մզկիթ (Պակիստանի Իսլամաբադ քաղաքում) . կառուցվել է 1986 թվականին՝ Սաուդների Արաբիայի Ֆեյսալ Բեն Աբդուլ Ազիզ թագավորի ֆինանսավորմամբ: Թեպետ այս մզկիթ նախատեսված է 74 հազար հավատացյալի համար, բայց շրջակա բակի ու պարտեզի հետ միասին կարող է ընդունել շուրջ 300 հազար մարդ:
Զայիդ իբն Սուլթան ալ Նահյանի կամ Շեյշխ Զայիդի մզկիթ (Արաբական Միացյալ Ամիրայության մայրաքաղաք Աբու Դաբիում) . 2007-ին կառուցված այս մզկիթին պետության հիմնադիր նախագահի անունն է տրվել: Մզկիթն ունի 80 գմբեթ ու 100 սյուն: Այստեղ է փռված աշխարհի ամենամեծ ձեռագործ գորգը: Մզկիթը կարող է միաժամանակ ընդունել 40 հազար հավատացյալ:
Բայթուլ Մուքարամ (Սուրբ տուն) մզկիթ. գտնվում է Բանգլադեշի մայրաքաղաք Դաքքայում և միաժամանակ կարող է ընդունել 40 հազար հավատացյալ: Այս մզկիթի առանձնահատկությունն այն է, որ նման է Մեքքայի Քաաբին:
Սուլթան Քաբուսի մզկիթ կամ Մասքաթի մայր տաճար (Քաթարի մայրաքաղաք Մասքաթի գլխավոր մզկիթը) . սրա կառուցումը ֆինանսավորել է երկրի սութան Քաբուսը: Կառուցվել է 2001-ին, կարող է ընդունել 20 հազար մարդ: Մզկիթի հատակին փռված գորգն աշխարհի ամենամեծ միահյուս գորգն է (երկարությունը՝ 70 մետր, լայնությունը 60 մետր): Այս մզկիթում է կախված նաև աշխարհի ամենամեծ ջահը (պարունակում է 24 կարատ ոսկի):
