Անցած գիշեր հրդեհ է բռնկվել Գյումրու Ձորի թաղի կիսախարխուլ տներից մեկում, որտեղ իր երկու անչափահաս երեխաների հետ բնակվում է միայնակ մայր Կարինե Մամաջանյանը: Կարինեի պատմելով, նոյեմբերի 3-ի ուշ երեկոյան, նկատելով կտուրից դուրս ելնող ծուխը, ահազանգել է հրշեջ ծառայություն: Հրշեջները ժամանել են, և չհայտնաբերելով հրդեհի նախանշաններ հեռացել: Սակայն գիշերվա ժամը 02: 00-ի մոտակայքում հրդեհն ուժգնացել է և բռնկվել է կացարանի ամբողջ կտուրը: Ընտանիքի մայրն իր երկու անչափահաս երեխաներին մի կերպ դուրս է հանել ամբողջովին ծխով լցված կացարանից: Հրշեջների երկու խումբ է ժամանել որոնց հաջողվել է հանգցնել հրդեհը, սակայն կացարանը դարձել է բնակության համար ոչ պիտանի: Գյումրիում հատկապես երեկոյան և գիշերային ժամերին ցուրտ եղանակ է, ու արդեն իսկ մարդիկ տեղադրել են վառարաններ: Սովորաբար քաղաքում այս ամիսներին հրդեհավտանգ իրավիճակ է ստեղծվում, քանի որ հարյուրավոր ընտանիքներ դեռևս շարունակում են բնակվել փայտաշեն վագոն-տնակներում ու կիսաքարաշեն կառույցներում: