Հունիսի 27-ին Նոր Նորք վարչական շրջանի Ս. Ասլամազյանի անվան հ.1 երաժշտական դպրոցում տեղի է ունեցել տարեկան հաշվետու համերգը, որտեղ գեղեցիկ կատարումներով ելույթ են ունեցել կրթօջախի տարբեր բաժինների շնորհալի սաները: Միջոցառմանը մասնակցել են Երևանի քաղաքապետարանի աշխատակազմի տուրիզմի և մշակույթի վարչության մշակույթի բաժնի պետ Էմին Թորոսյանը, Նոր Նորք վարչական շրջանի ղեկավարի աշխատակազմի կրթության, մշակույթի և սպորտի բաժնի ներկայացուցիչները, ծնողներ և այլ հյուրեր: Տարիքային տարբեր խմբերի և բաժինների աշակերտները համերգային ծրագրի ընթացքում հանդիսատեսին են ներկայացել ուշագրավ կատարումներով` դրսևորելով իրենց կատարողական հմտություններն ու գիտելիքները: Արժևորելով տարվա ձեռքբերումները մշակույթի ոլորտում` կրթօջախի վերաբերյալ իր գնահատականն է հայտնել նաև մշակույթի բաժնի պետ Էմին Թորոսյանը: Երաժշտության աշխարհին հաղորդակցվող յուրաքանչյուր անձ մի յուրօրինակ ներաշխարհի կրող է, ապացույցը համերգային ծրագրին իրենց կատարումներով ապրող ու հանդիսատեսին ապրեցնող աշակերտների ելույթներն էին, որոնք դիմագիծ են հաղորդում մշակույթի այս օրրանին` կերտելով նրա նորօրյա, հիշատակության արժանի էջերով լեցուն տարեգրությունը:
Նկարները՝
այստեղ
