Հոդվածներ

19.04.2018
     Քայլերս ինձ այսօր նորից տարան մարզային գրադարան:
     Ազգային գրադարանային շաբաթ է, և Եղեգնաձորում նույնպես այդ շաբաթը ամեն տարի նշվում է, գրադարանային շաբաթի օրերին տարբեր միջոցառումներ են կազմակերպվում: Մարզային գրադարանի մանկական բաժնի աշխատակցուհիները չխնայելով ջանք ու եռանդ կազմակերպել էին ցուցահանդես և գրական երաժշտական ցերեկույթ: Ցուցահանդեսը կրում էր՝ «Ծաղիկների բույրը» խորագիրը, իսկ միջոցառման խորագիրն էր՝ «Գարունը մեր այգում»:
     Միջոցառման ներկաների թվում էին՝ գրադարանի աշխատակազմի աշխատակցուհիները, մարզպետարանի աշխատակիցներ և իհարկե միջոցառմանը մասնակից երեխաների ծնողները և ուսուցչուհիները:
     Երեխաները մեջբերումներ արեցին՝ բանաստեղծ Վահան Միրաքյանի «Լալվարի որսը» պոեմից.
    
     _Ծագում է մանուկ արևը գարնան
     Կովկաս լեռների ձյունե պատնեշից,
     Զարթնում են մեկ-մեկ սարերն աննման
     Ձմռան անվրդով քնի մշուշից.
    
     Երեխաները խոսեցին նաև տարբեր ծաղիկների նշանակության մասին:
    
     _Մեխակն ունի գանգուր գլուխ, սլացիկ հասակ, նուրբ տերևներ:
     Նա շատ համեստ է ու ընկերասեր:
     Բազմերանգ է իր գույներով,
     Այցելում է ամենքին,
     Ջերմացնում է բոլորի հոգին:
    
     _Վարդը գեղեցիկ է աննման,
     Բույր ունի անսահման,
     Շքեղ է նա ու չքնաղ
     Ծաղիկների մեր արքան:
    
     Փոքրիկ մի տղա եկել է պարտեզ, որ ամենագեղեցիկ ծաղիկը քաղի ու իր սիրելի ուսուցչուհուն նվիրի: Բայց դժվարանում է ընտրություն կատարել տեսնելով այսքան չքնաղ ծաղիկներ:
     Այս խոսքերից հետո այդ նույն փոքրիկ տղան վերջապես ընտրություն կատարեց և կարմիր վարդերի մի գեղեցիկ փունջ նվիրեց իր դասղեկ՝ Աննա Գալստյանին:
    
     Եվ ահա այս գարնանային միջոցառումը պետք վերջանար: Դե բոլորս էլ լավ գիտենք, որ սկսված յուրաքանչյուր բան, լինի դա ինչ որ գործ, դաս կամ միջոցառում, ունենում է իր վերջաբանը: Այսօրվա գեղեցիկ միջոցառումն ավարտեցին երեխաները շատ գեղեցիկ տողեր ասմունքելով.
    

_Խորհուրդներ եմ տալու ես Ձեզ
     Հրաժեշտի այս ջերմ պահին.
     Գարունները լավ պահպանեք,
     Մի պոկեք ոչ մի ծաղիկ:
     Հիշեք.
     Ամեն ծաղիկ մի հրաշք է,
     Ամեն մի ծիլ վաղվա ծաղիկ:
    
     Միջոցառման ավարտին երեխաների ծնողները և միջոցառման ներկաները շնորհակալական խոսքեր ուղեցին գրադարանի մանկական բաժնի աշխատակցուհիներին, բաժնի վարիչ տիկին Ջեմային և հեռացան իրենց հիշողությունների ցուցակում ևս մի գեղեցիկ օր ավելացնելով: