Իգլայի» գործով հաջորդ դատական նիստը տեղի կունենա օգոստոսի 28-ին, ժամը 11: 00-ին: Դատարանի այս որոշումը զայրացրեց ամբաստանյալներին:
«Անմեղ մարդկանց բռնել, գցել եք կամեռը, մի հատ էլ ուզում եք օգոստոսի 28-ին նշանակեն, ինչի՞ անիմաստ մի ամիս էլ նստենք: Շատ լավ կլիներ, որ գոնե դատական նիստերը շուտ լինեին», - դժգոհեց Սամվել Բաբայանը։
Ամբաստանյալներից Սանասար Գաբրիելյանը լրագրողների հարցին՝ ընդունո՞ւմ է իրեն առաջադրված մեղադրանքը, թե ոչ, պատասխանել է՝ «Սաղ սարքած է» ։
Նշենք, որ 6 ամբաստանյալներից Սամվել Բաբայանին մեղադրանք է առաջադրվել այն բանի համար, որ նա դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև փոխարկման արդյունքում ձեռք է բերել հանցավոր ճանապարհով ստացված գույք: Արմեն Պողոսյանին մեղադրանք է առաջադրվել առ այն, որ նա մի խումբ անձանց հետ` նախնական համաձայնությամբ, ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահրթիռային համալիր: Սանասար Գաբրիելյանին այն բանի համար, որ նա մի խումբ անձանց հետ` նախնական համաձայնությամբ, ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահրթիռային համալիր: Անդրանիկ Քոչարյանին մեղադրանք է առաջադրվել առ այն, որ նա օժանդակել է հանցավոր ճանապարհով ստացված գույքը` դրա հանցավոր ծագումը և իրական բնույթը խեղաթյուրելու և օրինական շրջանառության մեջ մտցնելու նպատակով ձեռք բերելուն: Կարեն Քոչարյանին մեղադրանք է առաջադրվել այն բանի համար, որ նա օժանդակել է հանցավոր ճանապարհով ստացված գույքը` դրա հանցավոր ծագումը և իրական բնույթը խեղաթյուրելու և օրինական շրջանառության մեջ մտցնելու նպատակով ձեռք բերելուն:
