Հունվարի 30-ին «Ոչ ապօրինի ավտոկայանատեղերին» նախաձեռնության անդամները Վանաձորի փողոցներում իրականացրեցին իրազեկման արշավ, որի ժամանակ հորդորում էին բնակիչներին Վանաձորի փողոցներում մեքենա կայանելու համար չվճարել, մեջբերելով օրենքի կետեր: Ընթացքում նախաձեռնության անդամներին մոտեցավ մի անձնավորություն, ով ներկայացավ, որպես Վիկտոր Դարբինյան, «Դիկտիս» ՍՊԸ-ի տնօրեն, որը քաղաքապետարանից ավտոկայանատեղեր օգտագործելու նպատակով վարձակալել է տվյալ տարածքները: Ակցիայի մասնակիցներին նա փորձում էր համոզել, որ իր գործունեությունն օրինական է և կան համապատասխան փաստաթղթեր, սակայն նախաձեռնության անդամները հակադարձեցին և իրենց ասելիքը հիմնավորեցին օրենքի կետերով: Նրանք պնդում էին, որ տվյալ դեպքում կա ակնհայտ անօրինականություն և ամեն ինչ անելու են այն վերացնելու համար, քանի որ իրենց համար համայնքի բնակիչների շահը գերակա է:
