Ինչպե՞ս վարվել թափոնների հետ
 Նոյեմբերի 20-ին ՀՀ ԳԱԱ երկրաբանական գիտությունների ինստիտուտի Հ. Կարապետյանի անվան երկրաբանական թանգարանը կազմակերպել էր իր հերթական բաց դասը թանգարանին կից գործող «Հրաբուխներ» Էկոակումբի սաների համար: Բաց դասն անցկացվեց Հայաստան ծառատունկ ծրագիր «Էյ-Թի-Փի» բարեգործական հիմնադրամի շրջանակներում՝ Կարին գյուղում: Հայաստան ծառատունկ ծրագրի աշխատակիցներից Ալեն Կոստանյանը երեխաներին ներկայացրեց ծրագրի հիմնական առաքելությունը: Հայաստան ծառատունկ ծրագիրը գործում է 1994 թ-ից եւ այս ընթացքում հսկայական աշխատանք է իրականացրել՝ Հայաստանում պայքարելով անապատացման դեմ: Ծրագրի շրջանակներում տնկվել և վերականգվել են միլիոնավոր ծառեր, ստեղծվել են բազմաթիվ աշխատատեղեր: Բաց դասի երկրորդ հատվածը վերնագրված էր «Թափոնների կառավարում», որը վարեց ծրագրի աշխատակիցներից Նվարդ Գեւորգյանը: Տիկին Գեւորգյանը երեխաներին պատմեց աղբի կուտակումից երկրագնդին սպառնացող աղետների մասին, ներկայացրեց թափոնների այլընտրանքային կիրառման տարբերակները եւ վերջում Էկոակումբի մասնակիցներին առաջարկեց եղեւնիներ պատրաստելու մի շարք այլընտրանքային ձեւեր: Դասի երրորդ հատվածում երեխաները հյուրընկալվեցին տնկարանում, որտեղ ծանոթացան մի շարք պտղատու եւ օգտակար բույսերի եւ ծառատեսակների հետ, որոնցից են արոսենին, կծոխուրը, չմենին, ձյունապտղիկը, մետաքսե ակացիան, փշատենին, ունապենին: Տնկարանում պարապմունքն անցկացրեց տնկարանի տնօրենը՝ Էմիլ Գրիգորյանը, ով պատմեց, որ ծրագրի տնկարաններում աճեցված և տնկված ծառերը կենսական նշանակություն ունեն. նրանք մարդկանց ապահովում են սնունդով, փայտով, բարիքներով և տնտեսության աճի համար անհրաժեշտ հնարավորություններով: Երեխաները վերադարձան Երեւան շատ բարձր տրամադրությամբ, վառ տպավորություններով եւ գիտելիքների մեծ պաշարով: Հիշեցման կարգով նշենք, որ սկսած 2010 թ. օգոստոսից թանգարանին կից գործում է էկոակումբ, որի գերնպատակը երեխաների մեջ բնության հանդեպ սեր արթնացնելն է, ծանոթացնելը Հայաստանի երկրաբանական առաջացումներին և էկոլոգիական հիմնախնդիրներին: Ուստի բազմիցս կազմակերպվում են ուսուցողական արշավներ և հենց տեղում երեխաների հետ անցկացվում են գործնական աշխատանքներ: Էկոակումբը ակտիվ գործունեություն է ծավալում ու նշում գրեթե բոլոր բնապահպանական տոները: Թանգարանի տնօրեն Գայանե Գրիգորյանը միջոցառմանը եզրափակիչ խոսքում շնորհակալություն հայտնեց ծրագրի կազմակերպիչներին՝ երեխաներին հյուրընկալելու համար, ինչպես նաեւ խիստ կարեւորեց ծրագրի դերն ու նշանակությունը Հայաստանի բնապահպանական խնդիրների լուծման գործում: |
