Ի՞նչ են ընթերցում հայ ժամանակակից գրողները
 Արթուր Հայրապետյան Գիրքն իմ խիղճն է, որ հաճախ եմ թերթում, թեև յուրաքանչյուր ինձ հարազատ գրողի գիրքը ձեռքս վերցնելուն պես՝ չեմ ուզում վերջանա պատմությունը: Գաբրիել Գարսիա Մարկես եմ կարդում հաճախ, Դոստոևսկի, իսկ հայ գրողներից՝ Հրանտ Մաթևոսյան, Ռուբեն Հովսեփյան, Վանո Սիրադեղյան... Հենզո Մանուչարյան Ես կարդում եմ միայն հայրենական գրողների գործերը, քանի որ կարծում եմ միայն նրանք էին գրում մեր ազգի ու խնդիրների մասին, ինչն ինձ շատ հոգեհարազատ է, բայց, այնուամենայնիվ, չեմ անտեսում նաև օտար գրողներին: Մարգարիտա Ասլանյան Սևակ Գևորգյան Հիմնականում 20-րդ դարի արտասահմանյան գրականություն եմ ընթերցում, նաև ժամանակակից, եվրոպական, ճապոնական, ամերիկյան... Հետաքրքիր պիեսներ ունեն ժամանակակից չեխ դրամատուրգները, օրակարգից դուրս չեն մնում նաև դասականները: Շատ ժամանակ վերընթերցելու անհագ պահանջ ես ունենում: Ամենակարևորն այս ամենում օտար լեզվով կարդալ կարողանալն է, որովհետև մենք մինչև այսօր ահռելի մեծ բաց և չլուծված շատ ցավոտ խնդիր ունենք. թարգմանության խնդիրն է: Եթե աշխարհի լավագույն գործերից շատերը մինչ այժմ հայերենով չկան, ապա անիմաստ է խոսել անգամ ժամանակակից արտասահմանյան գրականության մասին, չնայած անգլերեն թարգմանություններն այդ առումով ժամանակի հետ գրեթե համահունչ ընթանում են... Թավրե Միանգամից խոստովանեմ, որ ի տարբերություն երիտասարդ տարիների, հիմա խուսափում եմ ծավալուն գործեր ընթերցելուց։ Նախընտրում եմ ժամանակակից խոհափիլիսոփայական պոեզիա, ճապոնական թանկաներ և նովելներ, պատմվածքներ... Վահան Վալե Քանի որ սիրում եմ կարդալ բնօրինակը և, ցավոք, տիրապետում եմ միայն հայոց և ռուսաց լեզուներին, հիմնականում կարդում եմ մեր և ռուսների դասական գրականությունը՝ Պուշկին, Ցվետաեվա, Բարատինսկի, Բլոկ, Մանդելշտամ, Բրոդսկի: Եթե պատահում է լավ թարգմանություն՝ ընթերցում եմ նաև արտասամանյան: Ուսումնասիրում եմ նաև մեր ժամանակակից գրողներին: Գոռ Հարությունյան Ես բանասեր եմ, և իմ կարդացած գրականությունը այլ է, քան այն բանաստեղծինն ու արձակագրինը, որոնք, ասենք՝ տեխնիկական կրթություն ունեն: Հենց այս պահին կարդում եմ պարահոգեբանական գրականություն՝ մտքի ուժի և Տիեզերքի տիրապետություն և օրենքների մասին: Կարդում եմ մասնագիտական գրականություն՝ Շանթ, Մնձուրի, Հր. Թամրազյան, Եղիշե Չարենց, Հրանտ Մաթևոսյան... Բնականաբար, կարդում եմ նաև ժամանակակից գրընկերներիս՝ Դավիթ Ասատրյան, Էդ. Հարենց, Աշոտ Գաբրիելյան, Սարգիս Հովսեփյան: Նյութի հեղինակ՝ Վահե Ալեքսանյան |
