Այսօր Շառլ Ազնավուրի ծննդյան 100-ամյակին նվիրված հոբելյանական միջոցառումների շրջանակում, Two Arc ցուցասրահում, Սայաթ-Նովա 5, բացվեց Մկրտիչ Մազմանյանի աշխատանքների՝ ինտերակտիվ դիմաքանդակների, կոմպոզիցիոն աշխատանքների ու գծանկարների ցուցահանդեսը, որ կգործի մինչև մայիսի 10-ը։ Ցուցանմուշները ներկայացվեցին քանդակագործի աշխատանքների ու ստեղծագործական կյանքի մասին պատմող ալբոմի շնորհանդեսի ուղեկցությամբ։ Այցելուների քանակը շատ մեծ էր։ Ներկա էին Մազմանյանի արվեստի և Ազնավուրի երկրպագուները, արվեստի գործիչներ։ Պատվավոր հյուրն էր՝ Ազնավուր հիմնադրամի համահիմնադիր և հոգաբարձուների խորհրդի նախագահ Նիկոլա Ազնավուրը։
Ցուցահանդեսի հովանավորն է Team Telecom Armenia կազմակերպությունը։ Հավաքածուի մեջ ներառված էին քանդակագործի վերջին տարիների աշխատանքների մի մասը։ Զրույցի ընթացքում պարզվեց, որ աշխատանքների որոշ մասը, որոնց չափերը սրահի չափերին չէին համապատասխանում՝ ներառված չէին։ Հայոց արվեստասեր հասարակությանը, նաև սփյուռքահայ արվեստասերներին հիացրեցին Մազմանյանի ստեղծագործական յուրահատուկ լուծումները, ըստ էության Մկրտիչ Մազմանյանի կերտած Ազնավուրն այսօր դարձավ բոլորինը։
ՆիդՕրագրի համար՝ Երևանից
Նաիրա Հ․ Գասպարյան, բ․գ․թ․, դոցենտ, ԵՊՀ
Շնորհակալություն ԻՐԱՏԵՍ հասարակական, քաղաքական թերթին աջակցության համար
