Երուսաղեմի Ժառանգավորաց Վարժարանն ի գլուխս տեսուչ Տ. Թեոդորոս վարդապետ Զաքարյանի, իր ցավակցությունն է հայտնում ինչպես Գյումրի քաղաքի բնակիչներին, այնպես էլ համայն հայությանը, տեղի ունեցած անդառնալի ողբերգության համար: Այսօրվա բոթը ավելացրեց մեր սրտերում արդեն իսկ տիրող կսկիծը և այս տոնական օրերը համակցեց սև իրականության համադրությամբ: Հունվարի 17-ին Երուսաղեմի Սրբոց Հակոբյանց Մայր Տաճարում կատարվեց հոգեհանգստյան պաշտոն Ավետիսյանների ընտանիքի համար և աղոթք բարձրացվեց առ Աստված նրանց հոգիների հանգստության համար:
Աղաչում և խնդրում ենք Քեզանից, ո՛վ բազմագութ Աստված,
մեր ազգի հին ու նոր ամբողջ հավատքով ու հույսով ի Քեզ ննջածների, նաև նորոք հանգուցյալ Սերյոժա Ավետիսյանի համար:
Հիշի՛ր Քո ողորմությամբ Գալստյանդ մեծ Օրը,
թողություն շնորհիր նրանց բոլոր մեղքերին և սխալներին,
և դասի՛ր սրբերիդ հետ Քո աջակողմյան դասում,
և Քեզ փառք հավիտյանս հավիտենից: Ամեն:
