ԱՄՆ նոր նախագահ Դոնալդ Թրամփը նվերների միջոցով փորձել է ազդել իր ընտրարշավի լրագրողական լուսաբանումների վրա: Associated Press-ի փոխանցմամբ՝ այս մասին հայտարարել է Fox News-ի հեռուստահաղորդավարուհի Մեգին Քելլին:
Քելլիի Settle for More («Մեծով բավարարվի՛ր») հուշագրությունը, որում ներկայացված են նրա եւ միլիարդատիրոջ բարդ հարաբերությունների նրբությունները, կհրատարակվի նոյեմբերի 15-ին:
«Սա 2016 թվականի ընտրարշավի չներկայացված պատմություններից մեկն է. ես միակ լրագրողը չէի, ում Թրամփը նվերներ է առաջարկել՝ ակնհայտորեն այն նպատակին նախատեսված, որպեսզի իրեն հարմարցվեին լրատվամիջոցների լուսաբանումները», - նշել է Քելլին հուշագրության մեջ:
Լրագրողուհին նաեւ նշել է, որ Թրամփն իրեն առաջարկել է իջեւանել Նյու Յորքի իր հյուրանոցում կամ իր եւ ամուսնու համար Ֆլորիդա թռիչք ապահովել, որտեղ կարող էին այցելել հանրապետականի կալվածք: Քելլին հավելել է, որ առաջարկներից հրաժարվելը դյուրին որոշում էր:
