«Պոբեդա» լոուքոսթերը սկսում է Մոսկվա–Գյումրի ավիատոմսերի վաճառքը, լրագրողներին տեղեկացրել է լոուքոսթերի գլխավոր տնօրեն Անդրեյ Կալմիկովը։
«Վաճառքը կմեկնարկի նոյեմբերի 21–ից, իսկ 2016 թ.–ի դեկտեմբերի 15–ից ընկերություն կսկսի իրականացնել կանոնավոր թռիչքներ շաբաթական երեք օր` երեքշաբթի, հինգշաբթի և կիրակի։ Մեր ուղևորների համար կկազմակերպենք հատուկ և հարմարավետ տեղափոխում Գյումրու օդանավակայանից Երևան` Fly&Bus ծառայության շրջանակում», – նշել է Կալմիկովը, հաղորդում է
Ինտերֆաքս–տուրիզմը։
Ավիաընկերության մամուլի ծառայությունից ավելացրել են, որ նշված ուղղության համար կան սահմանափակ քանակությամբ տոմսեր նվազագույն սակագնով` 999 ռուբլի կամ 16 դոլար։
Ավելի վաղ հաղորդվում էր, որ ՌԴ օդային տրանսպորտի դաշնային գործակալությունը (Ռոսավիացիա) «Պոբեդային» թույլատրել է չվերթեր իրականացնել դեպի Գյումրի։
«Պոբեդան» հոկտեմբերի վերջին Ռոսավիացիայից թույլտվություն էր ստացել ուղիղ չվերթեր իրականացնել Մոսկվա–Գյումրի ուղղությամբ։ Միաժամանակ ավելի վաղ ընկերությունը նախատեսում էր Մոսկվայից թռիչքներ իրականացնել նաև Երևան` տարանցում կատարելով Դոնի Ռոստովում։ «Պոբեդան» այս ուղղությամբ թռիչքներ կատարելու թույլտվություն էր ստացել դեռ հուլիսին, սակայն թռիչքներն այդպես էլ չէր կատարել։
Նոյեմբերին «Պոբեդայի» աղբյուրը Ինտերֆաքսին տեղեկացրել էր, որ ընկերությունը հրաժարվում է Երևան նախատեսված թռիչքներից «Զվարթնոց» օդանավակայանում ուղևորների սպասարկման չափազանց բարձր գնի պատճառով (ըստ աղբյուրի` այն կազմում է 50 եվրո մեկ ուղևորի համար) ։
Այնուհետև Հայաստանի քաղաքացիական ավիացիայի գլխավոր վարչության մամուլի քարտուղար Սաթենիկ Հովհաննիսյանը հայտարարեց, որ «Պոբեդայի» չվերթերը նախատեսված չեն եղել «Զվարթնոց» օդանավակայանում, քանի որ այն «նախատեսված չէ բյուջետային ավիաուղիների սպասարկման համար» ։
Ինտերֆաքսի աղբյուրի խոսքով, Գյումրու «Շիրակ» օդանավակայանը, ի տարբերություն «Զվարթնոցի», «Պոբեդային» տրամադրել է սպասարկման արտոնյալ պայմաններ։ Ընկերությունից հաստատել են, որ «լոուքոսթերի աշխատանքի պայմանները շատ հարմար են», սակայն չեն հրապարակել սպասարկման արժեքը։
