Մոսկվայի իրավապահները փորձում են պարզել «Վնուկովո» օդանավակայանում կատարված տարօրինակ կողոպուտի հանգամանքները: Տուժողը նախ՝ հայտարարել էր առեւանգված 75 մլն ռուբլու մասին, հետո չափը նվազեցրել էր մեկ միլիոնի:
Ոստիկանությունը հայտնում է, որ նոյեմբերի 22-ին, ժամը 16:30-ին անհայտ անձն ահազանգել է, որ «Վնուկովո» օդանավակայանում դիմակավոր անձինք զենքի սպառնալիքով խլել են իր պայուսակը, որում 75 մլն ռուբլի է եղել:
Դեպքի վայր ժամանած ոստիկանները հայտնաբերել են 27-ամյա տղամարդու, որը Մոսկվա էր ժամանել Սամարայից: Չվերթը վայրէջք էր կատարել ժամը 13:25-ին: Հայտնի չէ, թե տուժողն ինչու անմիջապես ոստիկանություն չի դիմել: Իրավապահները ենթադրում են, որ նա չէր ցանկանում, որ դեպքի մասին հայտնի դառնա, քանի որ «սեւ փողեր» էր տեղափոխում: Ամենայն հավանականությամբ, զանգահարել է ոչ թե նա ինքը, այլ օդանավակայանում նրան դիմավորողը, որը տեղյակ էր փողերով պայուսակի մասին:
«Ինտերֆաքսը» հայտնում է, որ ոստիկաններին նա պատմել է, թե ինչպես «Ա» տերմինալից ելնելու պահին անհայտ երեք անձինք, երկու անգամ կրակելով ատրճանակից եւ ինքնաձիգից, տիրացել են իրեն պատկանող պայուսակին, որում 1 մլն ռուբլի է եղել, եւ հեռացել են Mercedes մակնիշի երկու մեքենայով: Նշված տեղում իրավապահներն իրոք արտասահմանյան զենքի երկու փամփուշտ են գտել:
Տեղի ունեցածն արձանագրել են օդանավակայանի տեսահսկման սարքերը, գրում է vesti.ru-ն: