Թուրքիայի նախագահ Էրդողանը Հայաստանին կոչ է արել վերջ դնել Լեռնային Ղարաբաղի անօրինական տիրապետմանը՝ հիշեցնելով ՄԱԿ-ի Անվտանգության խորհրդի բանաձևը:
Նա հայտարարել է, թե Թուրքիան դեմ է Հայաստանի կողմից Լեռնային Ղարաբաղի տիրապետմանը և ԱՄՆ-ին, Ռուսաստանին և Ֆրանսիային կոչ է անում վերջ դնել այս իրավիճակին, որպեսզի այս տարածքը վերադարձվի Ադրբեջանին:
Էրդողանն այս կոչ-պահանջը հնչեցրել է Ստամբուլում տեղի ունեցող Իսլամական համագործակցության կազմակերպության տնտեսական և առևտրային կոոպերացիայի մշտական հանձնախմբի անդամ երկրների նախարարների նիստում ելույթ ունենալուց հետո լրագրողներից մեկի հարցերին պատասխանելու ընթացքում:
«Համաձայն ՄԱԿ-ի Անվտանգության խորհրդի որոշման, - ասել է Էրդողանը, - Հայաստանի զինված ուժերը պարտավոր են, հնարավորինս արագ, հեռանալ Լեռնային Ղարաբաղի տարածքից և այն հանձնել իր իսկական տիրոջը՝ Ադրբեջանին: Ադրբեջանցիները պետք է կարողանան այնտեղ վերաբնակվել: Թուրքիան դեմ է այդ բռնազավթմանը և, հատկապես ԱՄՆ-ը, Ռուսաստանը և Ֆրանսիան, որ միջազգային մանդատ են ստացել, որպեսզի միջնորդ հանդիսանան, պետք է վերջ դնեն այս իրավիճակին: Նրանք պարտավոր են ավարտին հասցնել իրենց առաքելությունը»:
