04.05.2015թ. Լոռու մարզի Վանաձորի Պ. Սևակի անվան թիվ 30 դպրոցի ուսուցչուհի Հ . Բաբինյանը 4բ դասարանում «Ես և շրջակա աշխարհ» -ը առարկայից կազմակերպեց ամփոփիչ դաս` «45 րոպե աշխարհի շուրջ»:
Դասը նպատակ ուներ ամփոփել աշակերտների գիտելիքները վերոնշյալ թեմայից: Դասն ուղեկցվում էր համապատասխան սահիկահանդեսով, երգ ու պարով:
Այն սկսվեց անտիկ դարաշրջանում Երկրի գնդաձևության ապացույցներով, որը ներկայացրեցին աշակերտները Արիստոտելի և Սոփեստոսի երկխոսությամբ:
Ներկայացվեց նաև միջնադարյան Եվրոպայում տիրող իրավիճակը, երբ հերետիկոսություն էին համարում Կոպեռնիկոսի արևակենտրոն ուսմունքը:
Աշակերտները վարպետորեն ներկայացրեցին իտալացի տաղանդավոր գիտնական Գալիլեո Գալիլեյի դատավարությունը, որի ժամանակ ծերունազարդ գիտնականին ստիպում էին հրաժարվել իր հայացքներից:
Նրանք հետաքրքիր տեղեկություններ հաղորդեցին Չինաստանից և Հնդկաստանից բերված համեմունքների, զարդերի, մետաքսի, կողմնացույցի մասին: Եվ քանի որ այդ ժամանակաշրջանում Օսմանյան Թուրքիան իր դաժան թաթն էր դրել հռչակավոր Մետաքսի մեծ ճանապարհի վրա, վտանգավոր էր դարձել ցամաքային ճանապարհով Հնդկաստան և Չինաստան հասնելը, առաջարկեցին այդ ճանապարհորդությունը կատարել ծովով` հիմք ընդունելով Երկրի գնդաձևության գաղափարը:
Գեղեցիկ ձևով ներկայացվեց իսպանական արքունիքում տեղի ունեցած Կոլումբոսի և Իսպանիայի թագավորի և թագուհու զրույցը: Ստանալով նրանց համաձայնությունը` Կոլումբոսը ձեռնարկեց իր ճանապարհորդությունը:
Պարբերաբար ներկայացվում էին 6 մայրցամաքները, համառոտ տեղեկություններ հաղորդվում նրանց մասին: Ուշագրավ էր Անտարկտիդային վերաբերվող հատվածը, երբ առաջին դասարանցիները ներկայացան որպես պինգվիններ, որոնք իրենց երգով ու պարով մեծ շուք հաղորդեցին դասին:
Դասի ընթացքում աշակերտները կատարեցին Ռուբեն Հախվերդյանի «Իմ փոքրիկ նավակ» և Ֆորշի «Հենց այսպես էլ ապրում ենք» երգերի` թեմային համահունչ, փոփոխված տարբերակները:
Դասն ավարտվեց երեխաների ուղերձով համայն մարդկությանը.
«Աչքի լույսի պես պահենք ու պահպանենք այս հրաշք փոքրիկ մոլորակը»: