Բլոգերի հայտնի ծառայությունը՝ Twitter-ը և խոշոր սոցիալական ցանց հանդիսացող Facebook-ը թողարկել են հավելվածներ Google ընկերության կողմից պատրաստվող ակնոց-համակարգիչ Glass-երի համար։
Twitter հավելվածը թույլ է տալիս կարդալ և պատասխանել մյուս օգտատերերի գրություններին (թվիթերին), ինչպես նաև կիսվել նկարներով՝ արված Glass տեսախցիկով։ Facebook-ի հնարավորությունները առայժմ սահմանափակ են։ Հավելվածում կարելի է ավելացնել նոր գրություն, կիսվել նկարներով և նկարներին մեկնաբանություն թողնել։ Նկարներ ավելացնելուց օգտատերը կարող է որոշել նաև, թե ովքեր կարող են տեսնել նկարը։
Glass-ի համար իր հավելվածն է ներկայացրել նաև Evernote-ն։ Հավելվածի օգնությամբ օգտատերերը կկարողանան պահպանել նկարներ և կարճ հոլովակներ, ինչպես նաև արտածել հիշեցումները Glass-ի էկրանին։
Այս և այլ հավելվածները ներկայացվել են Սան-Ֆրանցիսկոյում կայացած Google-ի կոնֆերանսին։ Կոնֆերանսին իրենց հավելվածներն են ներկայացրել նաև CNN հեռուստաընկերությունը, Elle ամսագիրը և Tumblr-ը։
Ակնոց-համակարգիչները հավանաբար վաճառքի կհանվեն այս տարվա վերջին։