ՀՀ կրթության և գիտության նախարարությունում Ուսուցչի օրվան նվիրված տոնական միջոցառումների շրջանակում տեղի է ունեցել մի խումբ մանկավարժների պարգևատրման հանդիսավոր արարողությունը: Շնորհավորելով ներկաներին՝ ԿԳ նախարարի տեղակալ Մանուկ Մկրտչյանը առանձնակի կարևորել է հանրային կյանքում ուսուցչի դերակատարումը. «Առողջ հասարակության ճշգրիտ չափանիշը ուսուցչի դիրքը, վարկանիշն ու նրա հանդեպ գնահատանքն է: Հասարակությունները, որտեղ ուսուցիչն ամենաբարձր դասն է՝ ավելի բարձր քան գիտնականը, զինվորականը, նախարարն ու մնացած բոլորը, հասել են զարգացման առավելագույն աստիճանի: Ուսուցչի կատարած գործի արժևորումը ապրելակերպ է, միաժամանակ սեփական խնդիրների լուծման հիմնարար սկզբունք», - իր խոսքում նշել է Մ. Մկրտչյանը: ԿԳ նախարարի հայտարարած «Ուսուցիչ» նախաձեռնության շրջանակում, ինչպես նշել է Մ. Մկրտչյանը, նախատեսվում է ամրագրել ուսուցչի բազային աշխատավարձի շեմ, որպես սոցիալական երաշխիք:
«Ավանդույթները և նորարարությունը մանկավարժության մեջ» անվանակարգում ի թիվս այլ ուսուցիչների պարգևատրվել է Կոտայքի մարզի Ֆանտանի միջնակարգ դպրոցի ինֆորմատիկայի ուսուցիչ Գայանե Կոստանդյանը:
Կոտայք Կրթություն Մշակույթ
